Янъыларда Раменский округынынъ «Борисоглебский» спорткомплексинде ден савлыгы бойынша толы амаллары болмаган спортсменлери арасында Россия чемпионаты болып озды. Спорт шарасында элимиздинъ 20 регионларыннан 95 спортсменлери ортакшылык эттилер. Чемпионаттынъ тамамы бойынша 2027- нши йылда Австралияда оьтеек дуныялык чемпионатына Россия йыйылыс командасына кандидатлары белгилендилер. Турнирде катнасувшылар ок атувдынъ бир неше кеплери бойынша базластылар. Сол спорт шарасында согыс спецоперация ветеранлары да ортакшыладылар. Дагестан йыйылыс командасынынъ тизиминде болып, ок атув базласында карагаш ногай яс Эдуард Кильдалиев те ортакшылык этти. Соьйтип яс блочный огын ялгыз оьзи атув эсабы бойынша – ез, команда эсабы бойынша – куьмис медальлерине тийисли этилди. Эдуард Астрахань областининъ Красноярск районынынъ Сеитовка авылында 1983-нши йылдынъ май айынынъ 5-нши куьнинде тувган. Дагестаннынъ бас каласы Махачкалада турып, сол спорт кеби бойынша аьзирленип келеди. Ол – бек ымтылыслы яс. Спорттынъ кайсы кеби мен кызыксынса да, ол, оьз кызыксынувын бас орынга салып, етимислер казанып келеди. Буьгуьнлерде Эдуард ок атув бойынша базласларында дагестаннынъ йыйылыс командасы тизиминде катнасып келеди. Ок атув ман Эдуард 2000- ншы йылдан алып кызыксынады. 2017-нши йылдан алып яс ок атувдынъ аьдеттеги кебинде оьзин сынап келеди, оннан сонъ, 2024-нши йылда блочный огын атувына коьшкен. Карагаш ногай яс Эдуард Кильдалиев коьплеген турнирлерининъ баргы иеси, бу йыл ишинде ок атув бойынша Россиядынъ спорт устасына нормативлерин толтырды. Эдуардтынъ сол етимиси уьйкен сыйга тийисли эм яс йигитимиз уьшин оьктемсуьв сезимлерине толтырады, бийик мырадларына етисуьвге коьнъиллендиреди. Биз де Эдуардка, ок атув бойынша йогары дережели базласувларда келеекте де катнасып, енъуьвшилер сырасында болып, алдына салынган кайсы мыратларына да етисип келгенин йораймыз. 

Г.Нурдинова. Суьвретте: Эдуард Кильдалиев.