Янъыларда Астрахань каласында «Три кота» савда орталыгында ногай ямагатынынъ ваькиллерин, кала яшавшыларын эм онынъ конакларын бирлестирген шатлыклы оьзгерис – Ногай маданиятынынъ куьни йогары коьнъилде уйгынланып озды. Шара регион бойынша ногай биригуьвлерининъ эм яратувшылык коллективлерининъ коьтергишлеви астында озгарылып, онлаган катнасувшыларды эм каравшыларын бирге йыйды. Йыйылган конакларга кызыклы программа аьзирленген эди. Айтпага, яратувшылык коллективлери халк йырларын йырлап, ортада туьрли биювлерин оьнерли бийип, байрам катнасувшыларынынъ коьнъилин оьстирдилер. Солай болып, миллет кийимлери эм ногайлардынъ уьйшиликте кулланатаган алатлары салынган выставкасы да аьзирленген эди. Айырым эс ногай ашханасына да каратылды. Йыйылган конаклардынъ даьмли миллет асларыннан татпага амаллары да болды. Каравшылар Астрахань областинде яшайтаган халкларынынъ тарихи эм маданияты бойынша викторина эм биюв флешмобы катнасувшыларынынъ сырасын да туьздилер. Шара уйгынлавшыларынынъ соьзине коьре, сондай йолыгыслар яс несилине маданият асабалыгын сакламага эм оны коьширмеге, баска болып, регионда халклар аралык кенъесуьвди беркитпеге оьз амалын этеди. Аьдетинше, Астрахань области халклар эм маданиятлар туьрлилиги мен баскаланады, эм сондай шаралар кенъесуьвдинъ эм бай сулып пан боьлисуьвдинъ шынты майданы болып келедилер. Астрахань каласындагы ногай ямагат ваькиллери, Маданият куьнининъ байрамшылавы савда орталыгында озгарылувы эм сол оьзгеристе коьплерге катнаспага амал берилгени, бек маьнели экенин белгилейдилер. Сол куьн «Три кота» савда орталыгына бир зат алмага келгенлерге де кызыклы байрам катнасувшылары болмага амал берилди. Уйгынлавшылар савда орталыгынынъ етекшилевин сол баславды коьтергишлеп эм шара озгармага майданды бергени уьшин уьйкен разылыгын айттылар, баска болып, Астрахань каласында сондай маданият шараларын озгарып келееклери акында да уьмитлерин билдирдилер. 

Суьвретте: шара катнасувшылары.