Ногай халкынынъ талаплы кызы, белгили язувшы Бийке Исхак кызы быйыл оьзининъ сыйлы мерекесин белгиледи. Драматург, публицист, шаир Бийке Кулунчаковадынъ 80 йыллыгына багысланып, Махачкала каласында шатлыклы шаралар оьтти. Дагестан педагогикалык патшалык университетинде Дагестан Халк язувшысы Бийке Кулунчакова студентлер мен йолыгысты. Йогары окув ошагына бу йолыгыс маьнели эди, неге десе данъклы ногай язувшысы мунда окыган эм буьгуьнлерде окып турган студентлерге оьзининъ яратувшылык йолы акында хабарлады, яшав сулыбы ман боьлисти. Шарады Дагестан Республикасынынъ Хатынкызлар союзы уйгынлаган. Шара катнасувшылары язувшыдынъ акында видеоролик пен таныстылар. Дагестан Республикасынынъ ат казанган маданият куллыкшысы Сабират Абубекерова кешликти юритти, ол ашык кепте Бийке Исхак кызынынъ шаирлигининъ, кара соьзининъ ярасыклыгын язувшыдынъ повестьлерининъ, хабарларынынъ бас геройларынынъ касиетлери бойынша коьрсетти. Сонъ ол соьзди студентлерге берди. Патимат Махмудова, Феруза Насрулаева, Мадинат Алиева Бийке Кулунчаковадынъ ятлавларын окыдылар, сол сыдыралардынъ теренлигин эм анъын тынълаганларга коьширмеге шалыстылар. «Меним балалыгымнынъ орамы» деген повестьтен уьзикти Карагас авылынынъ К.Кидирниязов атындагы мектебининъ окувшысы Суюмбике Шадырова окыды. Йолыгыста мерекешиге коьп ийги соьзлер айтылды. Дагестан Республикасынынъ Хатын-кызлар союзынынъ етекшиси Хасайбат Валиева Бийке Кулунчаковады «Аталыкка суьйим уьшин» медали мен савгалады. Солай ок ол университеттинъ яслар ман ислев бойынша управлениесининъ етекшиси Лаура Феталиевага Россия Хатынкызлар союзынынъ Сый грамотасын тапшырды. Бийке Кулунчаковага каратылган кутлав соьзи мен ДГПУ окув-методикалык иси бойынша проректоры Ибрагим Дибиров, Ногай районынынъ Хатын-кызлар советининъ председатели Асият Манкаева, Терекли-Мектеб авылынынъ аькимбасы Марат Кулунчаков, Россия Язувшылар союзынынъ агзасы, шаир Салимет Майлыбаева шыгып соьйледилер. Залда ашык микрофон иследи, студентлер язувшыга яшав, адабият акында туьрли соравлар бердилер. Олар язувшыдынъ яратувшылык йолы, ятлав кайтип дуныяга энетаганы, тувган ерине, ата-баба тамырларына кайтип алаллык сакланатаганы эм соны ман бирге савлай дуныя ман саният тили мен соьйлемеге болатаганы акында сорадылар. Бийке Исхак кызы, ясларды кыйнайтаган ойларды тез анълап, олар ман сенимликтинъ эм анъламлыктынъ коьпирин туьзди. Бийке Кулунчаковадынъ яваплары акыллы эм йылувлыкка толы эди: ол суьйим эм тувган ери, эстинъ маьнелиги акында хабарлады. Язувшы аьр заманда да оьзи мен де, баскалар ман да намыслы болган, сога ясларды да шакырды, неге десе шынты адабият намыслыктан, аьдилликтен басланады. Йолыгыс йогары яратувшылык эм уйгынлав дережесинде оьтти. Ол тувган ердинъ аьвелгисине суьйимге, адабият саниятына, уллы язувшымыз Расул Гамзатовтынъ яратувшылыгын эске алувга, ятлавларга, кара соьзге, ден савлык, узак яшав эм яратувшылык оьмир йоравларга толы эди. Ярасык сеси мен ДР ат казанган артисткасы Айгуль Джумагулова Бийке Кулунчаковадынъ соьзлерине язылган «Йолыгыс» йырын эситтирди. Бийке Исхак кызы ман йолыгыс тек адабият кешлиги болып калмай, несиллер ара шынты коьпир болды. Ол тагы да яслардынъ эсине маданият тек китаплердинъ бетлери тувыл, тири сеслер, тарихлер эм бактылар экенин эслерине салды. Махачкала каласында орта кала китапханасында Дагестан Халк язувшысы Бийке Кулунчакова ман йолыгыс оьтти. Шарады уйгынлады эм юритти китапхана куллыкшысы Эльмира Омарова. Шарада студентлер, китапхана куллыкшылары катнастылар. Сыйлы конаклардынъ арасында ДР Халк Йыйынынынъ депутатлары Алибек Мурзаев эм Мурзадин Авезов, ДР Язувшылар союзынынъ ногай секциясынынъ етекшиси Гульфира Бекмуратова, шаир, Карагас мектебининъ ана тили эм адабият сабакларынынъ окытувшысы Салимет Майлыбаева, ДГУ экология кафедрасынынъ доценти Патимат Бекшокова, балалар эм оьспирлер уьшин республикалык «Орленок-Дагестан» газетасынынъ бас редакторынынъ орынбасары Джаминат Магомедова, ОртаТоьбе авылынынъ мектебининъ окытувшысы Фатима Оразова бар эдилер. Студентлер ятлавлар окыдылар, ярасык этип студент Арсен Алиев йырлады. Шыгып соьйлегенлер Бийке Кулунчаковадынъ яратувшылыгы, тувган тиллерди саклав акында соьйледилер. Мерекешиге коьп ийги соьзлер айтылды, ден савлык эм аьли де уьстинликлер йоралды. Студентлер алдында соьйлегенде, белгили язувшы оьзининъ яшавы, яратувшылыгы акында хабарлады, оларга салынган мыратларга бир заттан да коркпай бармага керек деп айтты, ийгиликлер, етимислер йорады. Дагестан Республикасынынъ Халк Йыйынынынъ депутаты Мурзадин Авезов Бийке Кулунчаковага ДР НС КПРФ фракциясынынъ етекшиси С.Абдулхаликовтынъ атыннан Разылык хат тапшырды. ДГУ экология кафедрасынынъ доценти Патимат Бекшокова мерекешиди кутлады эм тувган шоьли акында Бийке Кулунчаковадынъ ятлавын окыды. Йылы эм маьнели йолыгыслар коьтеринъки коьнъилде оьттилер. 

Г.Бекмуратова. Суьвретте: шарадан коьринис.