Оьткен юмадынъ ишинде, янъы ярастырылган музей меканында бир аьлемет кешлик озгарылды. Бу кешлик «Саниятлар туьнлери» акциясы ишинде музей куллыкшылары ман уйгынланды. Кешлик конагы бу йыл ишинде оьзининъ 80 йыллык мерекесин белгилеген Бийке Исхак кызы Кулунчакова эди. Белгиленген акция ишинде оьткен шарада мерекеши язувшы ман яшавы бойынша аьллескен, оны ман бирге йогары окув ошагында окыган, оьсип келетаган яс несил ортакшылык этти. Баслапкы соьзди музей етекшиси Зульфия Отарова конакларга хош келди соьз бен баслады, сонъ язувшыдынъ яратувшылык йолы акында хабарламага эм армаганда кешликти юритуьв ыхтыярын Джамиля Аманбаевага берди. Ол болса, Бийке Кулунчаковадынъ акында коьп кызыклы соьзлер айтты, онынъ ногай адабиятындагы орынын белгиледи, оьз соьзининъ араларында язувшыга соравлар да берди. Элбетте, мерекешидинъ яваплары кыска тувыл эди, ол аьр бир соравга тешкеруьвли яваплады. Онынъ яшав эм яратувшылык йолын аьр бир мундагы конак болган инсан коьз алдына аькелди. Кешлик кызыклы эди, соьйлегенлердинъ арасында маскаралаганлар да болдылар. Оьзек те, маскара болса, коьнъил де коьтериледи, а аьдем яшавы онсыз болмайды. Шарадынъ барысында язувшы акында хабарлаганлар – халкымыздынъ коьрнекли эм коьримли аьдемлери Мурзадин Авезов, Нарбике Муталлапова, Зухра Мусаурова, Салимет Майлыбаева, Гульфира Бекмуратова, Курасхан Ярикбаева, республикамыздынъ бас каласыннан келген конак «Орленок Дагестана» газетасынынъ бас редакторынынъ орынбасары Джаминат Магомедова. Бийке Кулунчаковадынъ кайдай туврашыл аьдем экениннен алып сондай куллысуьер, терен ойлары ман язувшы экенине дейим де хабарладылар. Язувшы оьзи бу куьнлердеги аьел баалыклары, тилди саклавга кайдай куьш салынатаганы акында оьз ойы ман боьлисти. Мерекешиге кутлав соьзин «село Терекли-Мектеб» СП МО аькимбасы Марат Кулунчаков айтып, гуьл байламын савгалады. Шоьллигим. Табияты ман, туьрли туьсли оьсимликлери мен – мыс кокыган ювсаны ман кызыл туьсли боьригоьзлери мен бай ери. Бай оьзининъ яратувшылыклы аьдемлери мен де, солардынъ бириси – Бийке Кулунчакова. Бу йыл онынъ 80 йыллык мерекеси район, республикалык кезегинде белгиленди, туьрли учреждениелерде коьплеген шаралар онынъ сыйына оьткерилдилер, аьдемлердинъ эслеринде коьп заманларга каладылар. Сондай эсте калган шаралардынъ бириси музейде де оьтти.

  Галима Курганова. Суьвретте: музейде кешлик.