Орта-Тоьбе авылынынъ мектебинде ДР ат казанган маданият куллыкшысы, «Шоьл тавысы» республикалык газетасынъ бас редакторы, согыс аьрекетининъ
ветераны Эльмира Юнус кызы Кожаева ман йолыгыс оьтти.
Солай ок шарада конак кебинде «Шоьл тавысы» республикалык газетасынынъ корреспонденти, ДР Язувшылар союзынынъ ногай секциясынынъ етекшиси Гульфира Бекмуратова, Орта-Тоьбе авылынынъ администрациясынынъ специалисти Магира Абубекерова катнастылар. Мектебте аьрекетлейтаган «1ОРТатюбе» медиа-орталыгынынъ яс журналистлери Амалия Ярболдиева эм Хадиджа Кокенеева конакларга кызыклы соравлар берип, хабарласув эттилер.
Шара озгарылган кабинет Эльмира Кожаевадынъ китаплерининъ, макалаларынынъ выставкасы ман, суьвретлерининъ стенди мен кепленген, уйгынлавшылар видеоролик аьзирлегенлер.
Шара юритуьвшилер Ислам Нургушиев эм Алима Джумагишиева, ана тил окытувшысы Сания Халилова мерекешидинъ яшав эм яратувшылык йолы
акында хабарладылар. Окувшылар шаирдинъ ятлавларын яттан айттылар, Келдимурат Боршакаев эм Эльфида Кошанова йырлар йырладылар, кызлар биюв
куьби «Айланай» биювин коьрсеттилер. Эльмира Кожаевадынъ «Ногайыма», «Анама», «Сраждин Батыровтынъ эсине», «Кумлыга багыслав» ятлавлары
айтылды.
Кутлав соьзи мен шыгып мектеб директоры Сапият Межитова, окытувшы, авыл китапханашы Сеперхан Джумагишиева, администрация куллыкшысы Магира Абубекерова соьйледилер. Олар Эльмира Юнус кызына берк ден савлык, келеектегиде янъы енъуьвлер йорадылар. Гульфира Бекмуратова мерекеши мен бирге ислегени, онынъ яратувшылык проектлери акында хабарлады.
Оьз соьзинде Эльмира Кожаева уйгынлавшыларга оьз разылыгын билдирди, балаларга Аталыгымыздынъ онъайлыгына ислемеге, аьр заманда да алдыга бармага йорады, неге десе саьбийлер – бизим сенимимиз, келеектегимиз. Ол оьзининъ «Биз ким, хатынлар?» деген ятлавын окыды эм китабин мектебке савгалады. Конаклар мектеб музейинде, бавында болдылар. Шара коьтеринъки аьлде оьтти.
Г.Бекмуратова.
Суьвретте: шарадан коьринис.