Танъла, 19-ншы декабрьде, 12 саьатте «Владимир Путин мен йыл сырагылары» деген программасы элимиздинъ теле-радио-каналларында шыгаяк.
Озган йылдай болып, бир шара эки кеби бойынша оьтеек – тувра линия эм пресс-конференция. Россия Президенти Владимир Путин озып турган йылдынъ сырагыларын келтирип, элимиздинъ яшавшыларынынъ эм журналистлерининъ соравларына явап береек.
Соравлар карагыс айынынъ 4-нши куьниннен алып туьсип баслаган эм программа юрип турган шаклы алынып тураяк. Соравлар туьрли социаллык тармаклар бойынша туьседилер. Аьлиги заманда «Владимир Путин мен йыл сырагылары» программасына 1,3 миллионнан артык соравлар туьскен. Россия гражданлары, аьдетинше, туьрли соравларды, маьселелерди коьтередилер – экономика оьрленуьви эм социаллык программалар, регионларды эм аьеллерди патшалык яктан коьтергишлев амаллары, патшалыктынъ кавыфсызлыгы, технология яктан оьрленуьв, инфраструктуралык проектлер, тоьлевлер эм курылыс, айырым кепте СВО темасы эм соьйлесуьвлердинъ тамамлары. Бир-бир соравлар бойынша Владимир Путин региональли властьлерге эм яваплы службаларга маьселеди шешпеге керек деген тапшырувлар береди. Мысалы, сапаты осал йоллар акында.
Былтыр оьткен шара 4,5 саьат узагында болды. Россия Президенти Владимир Путин тувра линия бойынша 76 соравга явап берген. Баьриси сол заман эки
миллионнан артык соравлар йиберилген эди. Биз баьримиз де элимиздинъ басшысынынъ шыгып соьйлевин карап турамыз. Сол бек маьнели
оьзгерис, неге десе Владимир Путин тек озган йылдынъ сырагыларын келтирип калмай, Россиядынъ уьстинликлери акында эситтирип, алдымызга
янъы борышлар салады.
Г.Бекмуратова.