Ногай район орталыгы Терекли-Мектеб авылында «Казыят» саваплык фонды ман уйгынланган коллективлик авызашув кешлиги озгарылды. Онда Ногай район етекшилери, власть эм куьш структуралар ваькиллери, ногай аксакаллары, дин эм ямагат аьрекетшилери, СВО катнасувшылары, маданият эм спорт аьрекетшилери, конъысы, Россиядынъ аданаслык регионларыннан сыйлы конаклар ортакшыладылар.
Аьдетинше кешлик программасы Киели Кораннынъ аятларын окувдан басланды. Сонъ йыйылганларга каратылган соьзи мен Ногай район администрациясынынъ аькимбасы Джамалутдин Айнадинович Эсиргепов шыгып соьйледи. Ол мусылманларды киели Рамадан айы ман кутлады эм йыйылганларга онъайлык, савлык эм оьз ара аданаслык байланыслар беркигенди йорады. Оннан сонъ конаклар алдында хошлав соьзлери эм йоравлары
ман «Ногайский район» МР Депутатлар Йыйынынынъ председатели Алибек Каирбекович Менласанов шыгып соьйледи. Ол ердеслерин татымлыкка, патриотизмге, бир-бирисин сыйлавга шакырды.
Шарадынъ сыйлы конаклар ваькиллерине де соьз берилди: олар – районымыздынъ ясуьйкени, ДР ясларынынъ ат казанган насихатшысы Зубаир Зинеевич Аджибаев, Ставрополье муфтийининъ биринши орынбасары Фаизрахман хаджи Эсенов, Шешен Республика ногайларынынъ региональлик ямагат организациясынынъ председатели Дауд Еракаев. Оьз соьзинде олар ногайлардынъ маданият эм дин ягыннан бирлесуьвине, яслар арасында патриотизм сезимлерин тербиялавга каратылган «Казыят» саваплык фондынынъ аьрекетин хош коьретаганларын эм авызашув ман байланыста кешки тамакланувга шакырганы уьшин разылыкларын билдирдилер.
Айырым сыйлы конак эсабында бу шарада ортакшылык эткен СВО катнасувшысы, бу куьнлерде «Ногайский район» Депутатлар Йыйынынынъ депутаты Вагаб Эльмурзаевич Османов «Казыят» саваплык фондыннан киши хадж (умра) ерине барувга сертификат пан савгаланды.
Кешликтинъ тамамында «Казыят» саваплык фондынынъ председатели Рашид Акказиев бу енъил тувыл заманда дин тутувшыларынынъ баьрисине, тыскы
дин пропагандасына саклык тутып маьне берип, ерли имамлар эм сыйлы дин аьрекетшилер соьзлерине артык эс каратпага шакырды. Фонд председатели коьплеген мусылман эллери, айтпага, Турция, Персидский залив эллери, Саудовская Аравияды косылып, оькинишке, Россияга дослык ниетлиги йок США эм баска НАТО эллерининъ союзниклери эм партнерлары болатаганын белгиледи. Сол зат россия мусылманларын бу эллер диншилери мен яйылатаган деструктивлик пропагандадан эрек турмага борышландыратаганын айтты.
Соны ман, биргелес авызашув кешлиги йылы, аданаслык аьллеринде оьтти. Сахна бизим бирлигимизди аянлайтаган белги – Россия, Дагестан Республикасынынъ эм ногай халкы байраклары ман ярасыкланган эди. «Казыят» саваплык фондынынъ председатели «Амор Фати» банкет залына авызашув кешлигин озгарувга тегин эсабында пайдаланмага бергенлери уьшин разылыгын билдирди, оларга, солай ок Ногай районынынъ баьри яшавшыларына ден савлыгын эм дайымлык онъайлыгын йорады.
Л.Ибрагимова.
