Янъы окув йылы алдында Дагестан Республикасында «Окувшыды мектебке аьзирле» деген саваплык акция озгарылады. Шарадынъ бас ниети – коьпбалалы, колайсыз аьеллердинъ балаларын мектебке аьзирленуьвде колтыклав. «Шоьл тавысы» республикалык газетасынынъ ис коллективи де бу белгиленген шарада катнасты. Бу ак ниетли ис бир инсанды да корламаган эм биревге де зарар да келтирмеген, биз де бир кишкей балады суьйиндирдик. Коьп балалы аьелдинъ увылы Гамидхан бу окув йылда Терекли-Мектеб авылынынъ Кадрия атындагы мектебининъ билимлер дуныясына абытын алады. «Шоьл тавысы» республикалык газетасынынъ бас редакторы Эльмира Кожаева келеекте биринши класс окувшысына савгады тапшырды. Янъы портфель ишине мектебте окув уьшин баьри керекли затлар да бар эди. Гамидханга энди тек ийги окувды йораймыз. Гамидхан – Курбановлардынъ аьелинде доьртинши бала. Онынъ ата-анасы – Умаган Гамидхановна эм Магомед Магомедалиевич – бес увылды тербиялайдылар. Олар уьшин сол шаклы балаларды мектебке аьзирлев яшав сынавларынынъ бириси болады, сонынъ уьшин ямагат ягыннан этилетаган эс эм колтыклав аьелге бек уьйкен ярдам болады. Савгады тапшыра келип, Эльмира Юнус кызы Гамидханга окувда уьстинликлерди, билимлер дуныясында етимислерди, элимиз уьшин келеекте пайдалы инсан болганын йорады, ата-анага болса – тек шыдамлык эм баладынъ коьнъилин коьтеруьв эм аьр бир бала уьшин оьктемлик. Республикамызда «Балады окувга аьзирле» акциясы йыл сайын озгарылады. Сол бизим тыпаклыктынъ шайыты да болады эм биз бирге болып, соьйтип керексингенлерди колтыкласак, аьр бир баладынъ яшавына ярыклык эндирип, окувга аваслыгын да коьтерермиз. 

 Г.Курганова. Суьвретте: савга тапшырув шагында.