Дагестан. Бийик, ак баслы тавлардынъ эм шет-кыйырсыз шоьлдинъ эли. Аспанда оьктем карагуслар ушадылар, ерде йигерли эм танъ юрекли инсанлар яшайдылар.
Дагестан оьз увыллары ман данъклы, олар кайзаманда да, кыйынлык туьссе, Аталыкты коршаламага аьзир. Туьрли эм коьпмиллетли аьдемлер Дагестанда татымлыкта яшайдылар. Аьр бир халк оьз юрегинде кишкей Аталыгына эм уллы Россияга суьйимин саклайды.
Гитин Магомед увылы Сулейманов Махачкала каласында тувыпоьскен, мунда окыган, ислеген. Болса да, бакты оны Ногай районына аькелген, буьгуьнлерде ол Шумлелик авылында яшайды, аьлейи мен 4 бала тербиялайды. Шумлелик авылында коьплеген йыллардан бери даргинлер яшайдылар. Биз олар ман тек авылдас
тувыл, биз – ювык аьдемлер, неге десе сувды эм оьтпекти, суьйиништи эм кайгыды бирге боьлемиз.
Согыс спецоперациясы басланганда, Шумлеликтен де кетти яслар явды сокпага. Солардынъ арасында – Гитин Сулейманов. СВО ерине кетеектен алдын ол курувшы
болып ислеген.
Гитин Сулейманов (позывной Горец) биринши куьнлерден алып оьзин йигерли, яваплы аьскерши этип коьрсеткен, оьз йолдаслары арасында сый-абырай казанган. Бир кере яшав оны сондай аьлге келтирди, онынъ энъ де ийги касиетлери сол заман аян коьринди. Явдынъ турган ерлерине шапкынлык этуьв ниет пен Гитин йолдасы ман кетеди. Атылувлар авыр эди, оькинишке, олар яраланадылар. Йолдасынынъ ярасы айлак та авыр болган. Гитин токтасады: «Оьзимиздикилерге бирге кетемиз». Йол авыр эм узак эди. Айлак та арыганда, Горец тыншаймага токтайды. Оьзининъ аягын кайтип болса да байлаган аьскерши юрип болмайды, ама йолдасын да оьзи мен суьйрейди.
Уьш куьн юрдилер оьзлериндикилерге. Соьйтип, йигит оьз йолдасын куткарды оьлимнен. Гитин Сулейманов СВО еринде турган заманда коьп йолдасларын куткарган, кавыфсызлы ерге яраланганларды, оьлгенлерди шыгарган. Бир кере оьлгенлердинъ ишинде дагестанлы бар экенин анълады, телефонын алып, ким экенин билип, уьйге келгенде, кардаш-тувганларын тапты, увылы ман йолыгысты. Сонъында яс ога атасын аькелгени, коьмгени акында занъ сокты.
Гитин Сулейманов бир неше кере каты яраланган, ама госпитальден шыкканда ок СВО ерине, оьз йолдасларына кететаган эди. Ызгы ярасы айлак та авыр болды,
аьлиги заманда ол Махачкала каласында реабилитация оьтеди. Аьскерши Жуков медали, «За храбрость» II дережели медали мен савгаланган.
Согысувларда коьрсеткен йигитлиги уьшин Гитин «За отвагу» деген медаль алаяк. Сол да аьскершиге маьнели тувыл, ога энъ де уьйкен савга – ол куткарган аьдемлерден, олардынъ ювыкларыннан эситкен разылык соьзлер.
– Мен оьлгенди де, яраланганды да ят ерде калдырып болмайтаган эдим.
Сол меним борышым – инсандыкы, аьскершидики. Бизим енъуьв узак тувыл, ол бизики, неге десе бизге сенедилер, бизди уьйде куьтедилер.
Бизим артымызда – уллы Россия, элимиз уьшин биз яваплы, – деп айтады Гитин Магомед увылы Сулейманов. Оьз Аталыгынынъ шынты увылынынъ соьзлери.
Кашан да, келер енъуьв, яркырап келер. Сондай коршалавшыларымыз болган шаклы, сога биз шекленмеймиз.
Г.Бекмуратова.
Суьвретте: Г.Сулейманов.
