Янъы 2026-ншы эм 2027-нши окув йылынынъ алдында Бабаюрт районынынъ прокуратурасы «Окувга бармага ярдамлас» деген йылсайынлык саваплык акцияды баслады. Колайсыз яшайтаган аьеллер балаларын керекли затлар ман канагатлав – акциядынъ негизли мырадларынынъ бириси эди. Айырым эс яшавшылардынъ эки бас катламларына, айтпага, коьпбалалы эм аз канагатланган, солай болып, согыс спецоперация катнасувшыларынынъ аьеллерине каратылды. Сол аьел катламларына оьз аьвлетлерин мектебке аьзирлев – ол тек акша ман тувыл, психологиялык авырлыкларын да тувдырады эм, соны ман байланыста, патшалыктынъ коьтергишлеви ягыннан да айырым эсти талаплайды. Район прокуратурасынынъ куллыкшылары ман мектебте билим алувда кулланылатаган алатлары тешкеруьвли аьзирленген эдилер. Онда биринши класска бараяк окувшыга ортопедический дорбасы, туьрли туьсли карандашлар, фломастерлер, китаьплерге кийдирилетаган тыс, суьврет ясамага альбом, туьрли тептерлер эм сондай баска затлар бар эдилер. Аьр бир набор аьлиги заманнынъ билимлендируьв программасына эсапланып аьзирленди. Савга тапшырувдан баска, прокуратура куллыкшылары мектебке бармага аьзирлик коьретаган балалардынъ ата-аналары ман да йолыгыстылар. Профилактикалык кенъесуьвлердинъ барысында балалардынъ ата-аналарына билимлендируьв тармагындагы олардынъ ыхтыярлары, баска болып, регионаллык эм федераллык бойынша социаллык коьтергишлев амаллары, айтпага, мектебте берилетаган исси ас, мектеб пен уьй арасында йолга эм мектебке кийимди алув бойынша карыж тоьлевлери мен пайдаланмага болатаганлары акында анълатувлар этилди. – Билим куьни саьбийлер уьшин байрам болып калмага тийисли.Акша ягыннан тувган маьселелер сол маьнели яшав кезегин куьнъиртлендирмеге керек тувыл. Саьбийлер оларды коршалайтаганлар бар экенин, ата-аналар оьз маьселелери мен ялгыз тувыл экенин сездируьв – бизим бас борышымыз, – дейди район прокуроры Аскербий Дильманбетов. 

 Суьвретте: шарадан коьринис.