Дагестаннынъ бас каласында, кеспи куьнине багысланып, коьлемлик информация амаллар ваькиллери уьшин аьдеттеги байрам болып озды. Шатлыклы шарада оьз байрамын байрамшылав эм казанган савгаларын алув ниетте коьп журналистлер ортакшылык эттилер.
Сыйлы конаклар эсабында шарада республика етекшилигининъ ваькиллери – ДР Аькимбасынынъ Администрация етекшисининъ орынбасары, ДР Аькимбасынынъ информационлык политика эм пресс-служба Управлениесининъ начальниги Рашид Акавов, вице-премьер Заур Эминов, ДР Халк Йыйынынынъ депутаты Марат Алияров, солай ок туьрли ведомстволар етекшилери катнастылар. Савгаланганлар арасында журналистикадынъ сулыплы ветеранлары болганлай, солай ок яс специалистлер де бар эди.
Региональлик коьлем информация амалларынынъ айырым журналистлери туьрли йогары савгаларга тийисли этилиндилер: Россия журналистлер Союзыннан медальлер, ДР-нынъ информация эм баспа Агентствосыннан грамоталар, Россия журналистлер Союзыннан эм онынъ дагестан боьлигиннен Сый грамоталар тапшырылды, солай ок сыйлы атлар берилди. Дагестаннынъ информация эм баспа Агентствосынынъ етекшиси Арсен Газимагомедович Юсуповка Россия журналистлер Союзынынъ «Честь, достоинство, профессионализм» медали тапшырылды.
Шарады аша берип, Дагестан журналистлер Союзынынъ председатели Магамед Ибрагимов баьри йыйылганларды йылы хошлады эм кеспи байрамы ман кутлады. Ол солай ок Россия журналистлер Союзынынъ дагестан боьлиги сырасында 400-ге ювык журналистлер барын белгиледи. Кутлав соьзи мен соьйлевлерге  Рашид Акавов та косылып, журналистлерге ДР Оькиметиннен Сый грамоталар эм Россия журналистлер Союзыннан савгалар тапшырды.
– Дагестан журналистикасы буьгуьнде енъил тувыл аьллерде ислейди. Дагестан Аькимбасы Сергей Меликов, журналистлерди кеспи байрамы ман кутлай берип,
солай ок соны белгиледи эм баьри журналистлер сообществосына колтыклав соьзлерин айтты. Маьнелиси сол: баьри кыйынлыкларга карамастан, биз кеспиликти йогары дережеде тутпага эм журналистлер стандартларына алал болып калмага керекпиз, – деп белгиледи Рашид Акавов.