Ногай районындагы Россиядынъ Социаллык фонды истинъ йогары сырагыларын коьп бетинде боьликлердинъ биргелес ислеви эм куллыкшылардынъ кеспи усталыгы аркалы коьрсетеди. Фондта айырым аьдемлер эсабын юритуьв специалистлери, информация технологиялар боьлиги эм Ногай районынынъ гражданларын канагатлав бойынша Клиентлер службасы аьрекетлейди. Мунда гражданлар социаллык тоьлевлер, пенсия ман канагатлав эм баска коьтергишлев амаллар ман байланыслы болган баьри соравларга явап эм коьмек алмага боладылар.
Фондтынъ куллыкшылары тийисли тыншаювдагы эсли аьдемлерди канагатлайдылар, бу куьн болса бизим районда 5800 пенсионерлер яшайдылар. Мунда тек тийисли тыншаювдагы эсли аьдемлер мен тувыл, яшавшылар ман да куллыклар юритиледи. Социаллык фонды туьрли социаллык тоьлевлер эм коьтергишлев амаллар этеди, солардынъ сырасында авыраяклы хатынга эм бала тувув ман байланыслы болган тоьлевлер, солай ок ветеранларга, сакатларга, аьскершилер аьеллерине тоьлевлер.
Социаллык фонды согыс спецоперация катнасувшыларын эм олардынъ аьеллерин туьрли льготалар эм тоьлевлер мен канагатлайдылар. СВО ветеранлары элимиздинъ туьрли калаларындагы реабилитация орталыкларында тыншаймага эм эмленмеге боладылар, аьдемнинъ реабилитация орталыгына барув эм кайтув йолы да тоьленеди. Бу куьнлерде Ногай районыннан эки аьдем сондай орталыкларда эмленедилер, айтпага, Анапада – Рустам Зарманбетов, Волгоградта – Арслан Аджатаев.
Согыс спецоперацияда катнаскан мезгилде стаж эки кереге артып саналады. Кеспи байрамын белгилевге багысланган шарада Ногай районындагы СФР етекшиси Мадина Абдулалимова фондтынъ ийги атын кеплендируьвге демевлик эткен куллыкшылар акында айтты. Бириншилей, ол уьйкен сулыбы болган эм коьп йыллар намыслы исин бардырган бас специалист М.Эдильбаевады, экиншилей, Клиентлерслужбасынынъ специалист-экспертлери З.Ялманбетовады, Б.Ялманбетовады, А.Кульчиевады, Н.Аджиевады, Т.Мамаевти, Т.Якубовады эм А.Язлыбаевады белгиледи. Олардынъ куллыгы – сапатлы аьлде гражданларды канагатлав. Социаллык фондынынъ исине уьйкен уьлисти
Е.Азизова, Г.Кадылова, Э.Абубекерова, солай ок белги беруьв специалистлери Э.Аджимурзаева эм А.Юмартов, айти- специалист Ю.Эсенгельдиев косатаганын да етекши билдиреди.
Ногай районынынъ клиент службасы яшавшыларды канагатлав бойынша Дагестаннынъ Клиент службаларынынъ сырасында алдышы орынды алады. Онынъ исине йогары белги берген районымызга ис визити мен келген Дагестан Республикасы бойынша СФР боьлигининъ управляющийи Алжанат Загидова.
Ногай районынынъ Социаллык фондынынъ куллыгы – баьри боьликлердинъ биргелес исининъ уьлгиси.
Фондтынъ ис коллективи патшалыктынъ социаллык политикасынынъ борышларына эм яшавшылардынъ керексинуьвлерине таянып оьрленеди. Алдыда янъы проектлер эм баславлар, олар буйымларды боьтен де онъайлы этерлер.
Ногай районынынъ социаллык фонды республика бойынша алдышы орынларга зейинли управляющий Мадина Мусаевна Абдулалимовнадынъ етекшилеви аркалы шыккан. Онынъ етекшилев исинде бай сулыбы бар, ислеген организацияды ол янъы дережеге коьтереди. Солай болган аьли де: онынъ баславы аркалы коллектив баьри куьшин салып куллык этеди. Мадина Мусаевна коьтергишлеп, маслагат берип, даьврендирип, соны ман бирге истинъ сапатлы йогары уьлгисин борыш этип салып болады. Онынъ кеспи усталыгы, аьдемшилиги, ис коллективке сеними оьрленмеге эм аьли де уьстинликлерге етиспеге демевлик эткен онъайлы аьллер туьзеди. Сондай етекши мен куллык этуьв
алдыга йигерли абытлав болады.
Нурият Кожаева.
Суьвретте: Ногай районындагы СФР ис коллективи.
