Халклар бирлигининъ куьни алдында Дагестан Республикасынынъ Маданият министерствосында шатлыклы шара уйгынланып озды. Сол куьн оьз ис аьрекетинде йогары уьстинликлер коьрсеткен маданият тармагынынъ куллыкшылары белгилендилер.
Ногай патшалык халк саз алатлар оркестрининъ артисти Рашидхан Менлигулов Дагестан Республикасынынъ Халк Йыйынынынъ Маданият, яслар ислери, спорт эм туризм бойынша комитетининъ председатели Мурат Пайзуллаевтинъ атыннан Разылык хатына тийисли этилинди. Савга Рашидхан Менлигуловка илгерилик эм
етимисли аьрекети, кеспилигининъ йогары оьлшеми эм Дагестан Республикасынынь маданият асабалыгын кенъ таралтып, оны саклап эм оьрлендирип келгени уьшин тапшырылды.
Шатлыклы шара шынты юрек шакырув эм оьрметлев соьзлерине эм оьзин савлайы Дагестан маданиятына куллык этуьвине багыслаганларга терен сый этуьвге толган эди. Шарады аша келип, ДР маданиятынынъ министри Зарема Бутаева республикадынъ анъ-акыл байлык ягыннан кепленуьвинде саният аьрекетшилердинъ уьйкен маьнелигин белгилеп озды. Онынъ соьзлерине коьре, сол тармак куллыкшыларынынъ оьнерлиги эм сайлаган кесписине шынты алаллыгы яс несиллер уьшин
Дагестан маданиятын саклавга оьз себеплигин этип келеди.
Халк бирлигининъ куьни – Россия халкларынынъ тыпаклыгын эм бирлигин коьрсететаган байрамы. Бу маьнели куьн биз оьз иси эм оьнери мен элимиздинъ
оьрленуьвине оьз косымын этип, арувды эм талувды билмей, маданият асабалыгымыздынъ сакланувы эм байытувы уьстинде аьрекет этип келетаган маданият куллыкшыларын оьрметлеп кутлаймыз.
Суьвретте: Рашидхан Менлигуловка Разылык хаты тапшырылув мезгили.
