Дагестан Республикасына «Единая Россия» партиясынынъ регионаллык боьликлериннен гуманитарлык юк келуьви барады.
Куьшли ямгырлардан сонъ, коьплеген регион ерлеринде баьле-казалар болдылар, аьдемлер электроярыксыз эм ишетаган сувсыз калганлар, сога коьре, оларга яшавга бириншилей керекли затлар еткериледилер.
Энъ биринши болып, республика яшавшыларына коьмек Астрахань, Адыгея Республикаларыннан келди. Астрахань областининъ губернаторы Игорь Бабушкиннинъ етекшилеви астында бизим регионга 55 тонна сув, азык-туьлик эм ятар орын алатлары йыйналып, еткерилди.
Адыгея аькимбасы Мурат Кумпиловтынъ буйырыгы ман олар 60 тонна гуманитарлык юкти еткерди. «Адыгея сондай аьлде бир неше кере де болган, сога коьре, бу казага йолыкканларга кайдай коьмек те баслапкы куьнлерде яхшы коьтергишлев болады», – деди ол.
Авылдас регионлардан келген гуманитарлык юк волонтерларга берилген, олар болса, тийисли аьдемлерге еткередилер.
Дагестаннынъ регионаллык партия боьлигининъ секретари Сергей Меликов кыйынлыкта кол созганлардынъ баьрисине де разылыгын билдирди.
Эсинъизге салып озайык, Савлайроссиялык «Единая Россия» партиясынынъ председатели Дмитрий Медведев Дагестан еринде болган баьле-казадынъ калдыкларын тайдырувда исти куьшейтуьв уьстинде аьрекет этпеге керек деген буйырыгын берген.
Ногай районымыз да оьзининъ коьмегин бу куьнлерде кыйынлыкка калганларга этти. Хасавюрт районына гуманитарлык юк еткерилди. Гуманитарлык юк район яшавшылары ман йыйналды. Сол ярдам элтенген Адильотар эм Ново-Цилитль авыл яшавшылары да оьзлерининъ разылыгын билдирдилер.
Эки куьн узагында бизим район яшавшылары (коькек айынынъ 1,2-нши куьнлери) Ногай район МР Депутатлар Йыйынынынъ коьмеги мен гуманитарлык
юкти йыйнадылар. Сонынъ ишинде биринши эсапка керекли затлар бар эдилер: азык-туьлик, генераторлар, сув насослар…
– Биз де бек суьйиндик, колымыздан келген коьмегимизди этип болганымызга. Аьр бир колын коьмекке созган яшавшыга савбол айтамыз, – деп белгиленди Ногай район администрациясында.