Ногай район администрациясында янъыларда авыл поселениелер аькимбаслары ман республикалык эм район организациялар эм учреждениелер етекшилерининъ кенъеси болып оьтти.

Район аькимбасы Джамалутдин Эсиргепов шарадынъ куьн йосыгына биринши этилинип оьткен юмада болып озган куьшли явынлардан себеп кыйынлык коьрген республикадынъ калаларынынъ эм районларынынъ яшавшыларына гуманитарлык ярдамын этуьв акында сорав салынганын белгиледи.
Муниципалитеттинъ етекшиси тек янъыларда сондай коьмек эткен етекшилерге разылыгын билдирди. Болса да, онынъ ойы ман, ол зат толы ярдам тувыл.
«Буьгуьнлерде акша карыжлары танъла ок та аьрекетли аьлде турак уьйлерди ярастырув, кайтадан аякка тургызув уьшин керекли, неге десе аьдемлер мекансыз калганлар.
Буьгуьнлерде оларга патшалык ягыннан ярдам этилинеек, аьли толы бузылган уьйлерге нешаклы, ярты бузылган меканларга нешаклы акша карыжы керегетаганы акында санлар келтирилген. Ама бу ерде биз де баьле-казага йолыккан бизим конъсыларымызга Алла уьшин, ийги аьдемшилик аьдети бойынша коьмек этпеге керекпиз.
Сонынъ уьшин биз де ердеслеримизге бир куьнлик кыйын акымызды берип, ярдамга колымызды созбага тарыкпыз», – деди йыйылганларга район
басшысы.
Кенъестинъ барысында сонынъ катнасувшылары кыйынлык коьрген яшавшыларга коьмекке акша карыжды ювык арада йыйнармыз деп токтастылар.
Ногай районнынъ социаллык коршалав фондынынъ етекшиси Кайтархан Отегенова ярдам этуьвге аьр дайым да колын созатаган аьр кимге де разылыгын билдирди.
Д.Эсиргепов СВО катнасувшыларына ярдам этуьвге карыж йыюв акында оьз ойын айтып билдирди. Онынъ соьзине коьре, СВО катнасувшыларына коьмек этуьв ол аьр биримиздинъ борышымыз, неге десе ондагы ясларымыздынъ 95 проценти буьгуьнлерде согыстынъ алды сызыгында турадылар.
Оьткен йылдынъ консолидированлык бюджетининъ толтырылувы акында район администрациясынынъ финанс боьлигининъ начальниги Арслан
Кусегенов доклад этти. Кенъесте солай ок декларационлык кампаниядынъ эсабында федераллык законодательствога киргистилген туьрленислер акында район басшысынынъ коррупцияга карсылык этуьв бойынша маслагатшысы Руслан Аджиев анълатув этти.
СВО катнасувшыларынынъ эм олардынъ аьеллерин кабыл этуьв исти уйгынлав бойынша «Единая Россия» Савлайроссиялык политикалык партиясынынъ юритетаган куллыгы, келеяткан сайлавларга депутатларга партия ишиннен кандидатларды айырув бойынша баслапкы тавыслав исининъ басланувы акында «Единая Россия» партиясынынъ ерли Ногай район боьлигининъ секретари, район билимлендируьв боьлигининъ начальниги Амирхан Межитов хабарлады.
Ол «Единая Россия» партиясынынъ ерли район боьлиги атыннан Дагестан Республикасынынъ Халк Йыйынына депутатка кандидат этилинип быйыл
куьзде оьтеек сайлавларга Алибек Мурзаевтинъ кандидатурасы аталганын билдирди. Кенъесте тагы да бир неше соравлар ойласылды.
М-А.Ханов.