2025-нши йылдынъ казан айынынъ 1-нши куьнинде Ставрополь крайынынъ Нефтекум округынынъ Коясыл авыл маданият уьйинде Ясуьйкенлер куьнине багысланган
«Юректе яслык йырлайды» деген байрам программасы шатлыклы аьлде уйгынланып оьтти. Сол куьн ясуьйкенлер несили шарадынъ сыйлы конаклары болдылар. Йыйылганларга шаирлер эм язувшылар, айтпага, Куруптурсын Утешевич Мамбетов, Ферузат Койлубаевна Отевалиева «Аьзизим», «Мине энди биз де тетей болдык», «Домбыра», «Мен мунъаяман», «Бир кайта туьсиме меним сен келсенъ экен» деген орыс эм ногай тиллеринде язылган ятлавларын йогары сезимлер мен окып, йыйылган конаклардынъ коьнъиллерин коьтермеге шалыстылар. Музыкант эм композитор Мадина Мурзаева «Ландыши» деген йырын оьнерли йырлавы ман, аьр
кайсы шара катнасувшысынынъ юрек туьбиндеги сезимине етпеге шалысты. Конаклардынъ сол куьн шай ишуьв аьсеринде туьрли темаларга йырларын,
ятлавларын йогары сезимде окып эситтирмеге, юмакларды шешуьвде, такпакларды айтувда сынаспага амаллары болдылар. Кызыклы йолыгыстынъ сонъында шара катнасувшылары карс кагып бийип, уйгынлавшыларга, сондай йылы шара уьшин юрек разылыкларын билдирмеге асыктылар. Соьйтип, Ясуьйкенлер куьнине багысланган йолыгыс сыйлы конаклардынъ эсинде эм олардынъ юреклерининъ туьбинде, айырым орын алып, коьпке сакланаягына соьз йок. Йогары коьнъилде
эм дослык аьлде уйгынланып оьткен шарадан аьр бир ясуьйкен уьйине, йылы сезимге толып, коьтеринки коьнъил мен, йол алды.
Г.Нурдинова.
Суьвретте: ясуьйкенлер мен йолыгыстан коьринис.