3-нши декабрьде сав дуныяда Сакатлар куьни белгиленеди. Сол куьнди белгилев ямагатлыктынъ эс этуьвин сакатлардынъ маьселелерине, олардынъ
ыхтыярларын эм онъайлыгын коршалавга каратылады.
Халклар ара сакатлар куьнинде КЦСОН-нынъ балаларды эм балалы аьеллерди уьйинде социаллык яктан канагатлав боьлиги Ногай район администрациясынынъ эм организациялар коьтергишлеви мен ден савлыгы яктан толы амаллары болмаган балаларга байрам шарасын уйгынлады. Сол
куьн йыйналып, балаларды кувандырув муниципалитетте ийги аьдетке кирген.
«Ер малиеклери» проекти бойынша бу йыл да «Абдулла» банкет залында аьлемет саьбийлерге эм олардынъ аналарына берекетке мол сыпыралар курылды, ойынлар ойналды, савкатлар тапшырылды. Шарады ДР ат казанган артисти Артур Межитов коьнъил коьтерилис аьлде юритти.
Балалар уьшин байрам эртегиден «Кощей Бессмертный» эм «Баба Ягадынъ» ортага шыгып, ойнавы ман басланды. Оны Ногай патшалык драмалык
театрынынъ артистлери аьзирлегенлер. Сонъ «Ритмы» фестивалининъ лауреаты – «Юлдызлар» ансамблининъ катнасувшылары бийидилер.
Шарага саьбийлерди кутламага Яшавшыларды социаллык яктан аьжетсизлев орталыгынынъ етекшиси Хамидулла Саитов, Ногай район аькимбасынынъ орынбасары Мурат Шадиев, Терекли-Мектеб авыл аькимбасы Марат Кулунчаков, Яшавшыларды социаллык яктан аьжетсизлев управлениесининъ специалисти Маржанат Янгишиева, ДР Ямагат палатасынынъ агзасы, район Хатынкызлар советининъ председатели Асият Манкаева, Ногай район билимлендируьв боьлигининъ етекшисининъ орынбасары Медина Гапарова, Яшавшыларды социаллык яктан коршалав фондынынъ етекшиси Кайтархан Отегенова келдилер.
Олар шатлык иелерине ак юректен ден савлык, куьш, шыдамлык, ярык такыйкалар, оьз куьшине сенуьв эм йогарыда дайым таза аспан болганын йорадылар. Солай ок саьбийлер мен аналарынынъ эслерине олар ялгыз тувыл экенин, биз сизинъ касынъызда деп, салдылар.
Залды йылы, аьлемет, куваныш аьл бийлеп алды. Ер малиеклери уьйкен аваслык пан аниматорлар аьзирлеген ойынларда катнастылар, бийидилер, ятлавлар
окыдылар, киши-конкурста катнастылар. Олардынъ сырасында талаплы балалар да бар эди. Султан Сулейманов усташа домбырада ойнады, бек ийги этип йырлаганлар да болдылар. Байрам коьнъил коьтерилис аьлде оьтти, ол аьлемет балалардынъ эслеринде коьпке дейим куванышлы оьзгерис эсабында сакланаяк. Яшавшыларды социаллык яктан аьжетсизлев орталыгынынъ етекшиси Хамидулла Абдулвагапович Артур Межитовка, Ногай драмалык театрынынъ коллективи эм онынъ етекшиси Гульфия Кокоевага, «Юлдызлар» балалар ансамбли эм онынъ етекшиси Рабият Елакаевага байрамнынъ ийгилигин арттырганлары уьшин, солай ок йыл сайын балалар уьшин шарага даьмли зияпетлерин аькелетаган Авархан Эсенгельдиевага эм шарады озгарувда уьлисин
коскан аьр биревге разылыгын билдиреди.
Нурият Кожаева.
Суьвретте: балалар байрамыннан коьринис.
