Аявлы балалар! Сыйлы окытувшылар эм ата-аналар!

Ак юректен сизди аьлемет байрам – Билимлер куьни эм янъы окув йылы басланувы ман кутлаймыз! Билимлер куьни – аьр биримизге ювык айырым байрам. Аьдем оьз яшавында кайдай бийикликлерге етискен болса да, ога йол 1-нши сентябрьден басланады. Бу куьн – келеектеги енъуьвлерди эм етисуьвлерди, янъы билимлерди эм уллы эплер ашылувды куьтуьвге толган куьн. Боьтен де юрек телезуьв мен келеди ол Ногай районынынъ кишкей яшавшылары уьшин, билимлер дуныясына эсиклер биринши кере ашылып. Сол куьн олар уьшин янъы кызыклы яшавдынъ басы болсын, акыллы насихатшылар эм ийги дослар ман танысувды савгаласын. Уьйкен класслар окувшылары уьшин бу окув йылы кеспи сайлавда демевлик этсин. Оларга билимлер алувда уьстинликлер, келеекте кеспилик йолында сенимликти йораймыз. Оьзлери уьшин янына якын ис тармагын сайлаган студентлерге тек йогары кеспили специалистлер болып калмай, белсенли гражданлык позициясын тувдырувды, оьз бактысы уьшин тувыл, районымыздынъ келеектегиси уьшин де яваплы болмага керекти анълавды йораймыз. Билим тармагынынъ баьри куллыкшыларына кеспи усталыгы эм оьз исине алаллыгы уьшин ак юректен разылыгымызды билдиремиз. Бизим балаларымызга суьйимлигинъиз уьшин, оларды янъы билимлер алувга эм оьз оьнерлерин коьрсетуьвге онълавда бажарымлыгынъыз уьшин савбол соьзлеримизди каратамыз. Бу байрам куьни мен кутлап, сизге кеспи ягыннан оьсуьвди, ийги эм зейинли окувшыларынъыз коьп болганын, ден савлыгын эм онъыйлыкты йораймыз. Аявлы окувшылар! Наьсип, армаганда окувда эм исте уьйкен уьстинликлер сизге! Янъы окув йылы баьриси уьшин де кызыклы эм онъыслы болсын, янъы йоллар ашылувын эм етимислер суьйинишин аькелсин!

«Ногайский район»МР аькимбасы Д.Эсиргепов.

«Ногайский район» МР Депутатлар йыйынынынъ председатели Р.Байманбетов.