Аьскер (армия) – аьр эр аьдем оьтпеге керек уьйкен маьнелиги бар яшав вакыты, тербиялав мектеби, аьскер сырасында куллык этуьв – яслардынъ эли алдында киели борышы. Аьскер сырасында аьдем кепленеди…
Эгер совет заманындагы, оннан сонъгы йыллардагы россия армиясын алып карасак, савытлы куьшлер сырасында оьтетаган аьскерлик службасы келеектеги несилди кеплевде патшалык алдында уьйкен яваплылык тутатаганы коьринеди.
Мунда, аьскер сырасында, аьдем гражданлык яшавында оьрлентип болмайтаган маьнели касиет белгилерин кеплейди: айтпага, куьш-куватлыгын арттырады, оьз алдына мырадлар салып, оларды яшавга шыгарувды, нызамлык тутувды, борышларды толтырувды эм сондай баска затларды. Аталыгына куллык этуьв болжалында аьдем мен коьплеген туьрленислер болады.
Ол оьзин маьнели иске – Элин, Тувган ерин, аьелин эм балаларын коршалавга карыскырлыгы барын, олар уьшин яваплылы экенин сезеди…
Мине аьли де Россияда 1-нши октябрьден алып Савытлы куьшлер сырасына куьзги шакырув басланган эм ол быйылдынъ 31-нши декабрине дейим бардырылаяк. Россия Президенти Владимир Путин РФ Савытлы Куьшлер сырасына куьзги шакырувды озгарув акында указга кол баскан. Документ пен келисте сол болжал ишинде окув подразделениелерине эм аьскерлик боьликлерине эли алдында эр борышын толтырувга 135 мынъ яслар йиберилеек.
Ама быйылгы кампания кайбир айырымланган кепте оьтеек. Кенъ аьлде кулланылаяклар электронлы повесткалар, аьскерге шакырув дегеннинъ куьши йыл узагына сакланаяк.
Аьскер сырасына шакырув быйыл «Единый реестр воинского учета» деген патшалык билдируьвлер тармагын кулланув ман оьтеек, олай деген, электронлы повесткалар толы куьшинде пайдаланаяклар. Бу реестрде бизим элимиздинъ аьскер сырасына шакыртылмага керек гражданлар акында баьри билдируьвлер бар. Ол военкоматларга аьскерлик эсабынынъ билдируьвлерин ийги аьлде сакламага эп береди. Бу реестр оьз исин 2023-нши йылда баслаган, ама аьрекет эткен тестлер кебинде эм оны ман тек Марий Эл республикасы, Сахалин эм Рязань областьлерининъ яшавшылары пайдаланып болганлар. Быйылдынъ май айыннан алып «Реестрповесток.рф» сайты толысынша кебинде савлай элимиз уьшин аьрекет этеди. Электронлы повесткадынъ да алдынгы кагыттагыдайга тенъ куьши бар. Онда аьскер сырасына шакыртылатан ястынъ аты, тукымы, яшайтаган ери, не себептен военкоматка кайсы куьн эм не себептен шакыртылатаганы акында билдируьвлер
бар. Повесткады «Госуслуги» порталдан, «Реестрповесток.рф» сайттан еткериледи. Повестка бирдей реестрде ерлестирилип, 7 куьнлер озганнан сонъ, ол оны
ман таныспаган болса да, аьскерге шакыртылган яска тапшырылган деп саналады.
Любовь Уразаева,
Россия Журналистлер союзынынъ агзасы.
