Ногай халкынынъ ваькиллери Дагестан муфтийи, ДР аьлимлер советининъ председатели шейх Ахмад Афанди мен йолыгыстылар. Конаклардынъ дин етекшиси мен коьриспеге тилегин кабыл этип, Дагестан муфтиятынынъ куллыкшылары йолыгысты, заман танъкы болганына карамастан, аьзирледилер.
– Аьли кимнен бу ерде сорасанъ да, олардынъ юреги таза. Сол да босына тувыл, сол юреклерди Кудай ашкан. Сизинъ ата-бабаларынъыз йигерли аьдемлер болган, – деп айтты республика муфтийи.
Оьз соьйлевинде Шейх Ахмад Афанди ногай халкынынъ иманынынъ теренлигин, сол иманды берклендируьвге ногайлар этетаган куллыгын белгиледи, ол ногай хатынлардынъ йигерлиги акында да айтты.
Ногай районыннан келген ваькиллер дин насихатшысына оьз сыйын коьрсеттилер. «Ногайский район» МР етекшиси Джамалутдин Эсиргепов аьлиги заманда коьбиси намаз кылып, оразасын тутып, хаджга да баратагынын белгиледи. Сол ислер Дагестан муфтиятынынъ коьмек этуьви мен болатаганы район басшысы ман айтылды.
Йолыгыста муфтийдинъ маслагатшысы Айна Гамзатова ортакшылык этти.
Бизим хабаршы.