Йыл сайын кырк кийик айында Россияда эм савлай дуныяда фашизмнен оьлгенлердинъ эстелигине Халклар ара куьни белгиленеди. Бу куьн бизге Уллы Аталык
согысында нацист Германиядынъ колыннан оьлген миллионлаган инсанлар акында эсимизге салады. Эсимизде сакласак оларды, сондай баьле-каза кайтарадан болмас. Сол куьнге багысланып, Махачкала каласында шара озгарылды. Шарадынъ уйгынлавшылары – ДР Миллет политика эм дин ислери бойынша министерствосы, Дагестан патшалык педагогикалык университети эм Россия согыс-тарих ямагатынынъ региональли боьлиги. Йыйналганларга фашизм эткен кыянатлыклар акында хабарладылар. Оьлгенлердинъ сыйына уьндемев такыйка болды. Россия согыс-тарих ямагатынынъ региональли боьлигининъ етекшиси Энрик Муслимов сондай шаралардынъ озгарылувы маьнели экенин белгиледи. Экинши дуныялык согысы айлак та кан тоьгисли эди.
Согыста 61 патшалыклар катнастылар, 40 элдинъ еринде, тенъизде согысувлар оьттилер, 55 миллион аьдем оьлгенлер, солардынъ ишинде 27 миллион – Совет Союзынынъ гражданлары. Дагестан патшалык педагогикалык университетининъ ректоры Нариман Асваров оьз соьйлевинде согыстынъ барысында этилген кыянатлыклардынъ авырлыгы акында хабарлады, фашистлердинъ кир ислерин бир зат пан аклап болмаягын белгиледи.
Биз мутпаймыз сол согыста катнаскан аьскершилерди, олардынъ баьтирлиги дайым бизим эсимизде. Шара тамамында ямагат организацияларынынъ, ерли самоуправление органларынынъ ваькиллерине ведомстволык баргылар, гуьл байламлар тапшырылды. Республикамызда конфессиялар эм миллетлер ара тынышлыкты эм макулласувды беркитуьвге оьз уьлисин косканы уьшин Ногай районынынъ Орталык китапханалар тармагынынъ директоры Сабират Казгерей кызы Абубекеровага эм СВО катнасувшыларынынъ анасы Гульфира Байрамеш кызы Абдулбариевага ДР Миллет политика эм дин ислери бойынша министерствосынынъ «Миллетлер ара тынышлыкты эм макулласувды беркитуьв уьшин» Сый белгиси тапшырылды. Мен сондай баргыга тийисли болган хатын-кызларды кутлайман эм берк ден савлык, аьел наьсибин эм баьри ийгиликлерди йорайман.
А.Манкаева,ДР Ямагат палатасынынъ агзасы.
Суьвретте: шара катнасувышыла.