Навруз – аьдемшилик тарихинде энъ де бурынгы байрамларынынъ бириси. Ол язлык шагынынъ басланувы ман ер юзинде баьри затлардынъ янъыртувын белгилейди.
Ногай шоьлге Навруз келуьви мен байланыста, уьйкен байрам Терекли-Мектеб авылынынъ халк яратувшылык орталыгынынъ алдында озды. Майданда терме курылган, сонынъ ишинде ногай миллет кийимлер, бурынгы савытсадак, бала бесиги, кыскаша, атабабаларымыз бурын кулланган затлар коьрсетилген. Термединъ касында миллет зияпетлерге толган сыпыра курылган, сонынъ касында олтырып, конаклар ногай шай ишип, берекетти таттылар. Бу баьри зат Терекли-Мектеб авыл администрациясы ман уйгынланган, район маданият куллыкшылары ман болса байрам концерти озгарылды.
Йыйылганларды Навруз байрам ман Ногай район администрация аькимбасынынъ орынбасары Мурат Шадиев эм Терекли-Мектеб авыл администрация аькимбасы Марат Кулунчаков кутладылар.
Сонъ туьрли туьсли ярасык миллет коьйлеклер кийген кызлар ортага шыгып конакларды хошладылар. Оннан сонъ ярасык биювлери мен йыйылганларды «Карлыгаш», «Айданак», «Юлдызлар», «Ак шобан» балалар биюв ансамбльлерининъ катнасувшылары сукландырдылар. Олардынъ етекшилери Альмира Тунгатаровага, Рабият Елакаевага, Эльмира Суюндиковага эм Альфия Боршакаевага Халк яратувшылык орталыгыннан Разылык хатлар тапшырылды. Халк коьнъилин ДР ат казанган артистлери Зульфия Аджигиримова, Алимет Аблезова, солай болып, Орта-Тоьбе авыл маданият уьйининъ етекшиси Зульфия Оразова, Червленные Буруны авыл маданият уьйининъ етекшиси Феруза Аманкаева, Эдиге авылыннан Татлихан Рамазанова, Ленинаулдан Абидат Исхакова, Карасу авылыннан Равхан Солтанова, Батыр-Мурза авылыннан Сакинат Кувандыкова, ОртаТоьбеден окувшы Келдимурат Боршакаев йырлары ман коьтердилер.
Бек пайдалы болды педагогикалык исининъ ветераны Авасхан Кульниязовадынъ ногай такпакларды айтып, олардынъ маьнесин шешуьви. Завыклы оьтти баска ойынлар эм конкурслар да, соны ман бирге балалар юмакларды шешуьвде де оьз билимлерин сынадылар. Байрам концертин Гюльгерен Савкатова ман Медина Елманбетова юриттилер. Навруз байрамы Ногай район орталыгында йогары коьнъилде оьтти.
Нурият Кожаева.