Дагестан Республикасынынъ Ногай районында куьн коьзи радиациясын электроэнергияга айландыратаган 60 МВт куватлыгы болган СЭС (солнечная элетростанция) курылысы тамамланады. Бу проект Дагестан Республика Оькимети эм «Юнигрин Энерджи» ООО ара туьзилген келисуьвге коьре яшавга шыгарылады. Ога киритилген инвестициялардынъ оьлшеми 6,7 млрд. маьнет акшага олтырады.
Аьлиги заманга генераторлар ман болдырылатаган электроэнергия куватлыгын арттырув уьшин керекли куватлыгы 110 кВ электроустановка (повышающая
подстанция) курылысы тамамланган, майданда белсенли монтаж ислери юритиледи: табаны берк болсын уьшин фундамент тоьселген, трекер системалары
ерлестирилгенлер, куьн коьзининъ ярыгын дайымлык токка айландыратаган фотоэлектрический модульлери орынластырылганлар.
Проекттинъ яшавга шыгарылувы район экономикасына заьлимдей пайда береек:
– объект кулланувга берилген сонъ 21 аьдем дайымлык ис орыны ман, курылыс болжалында 100 аьдем кесек болжаллы ис орынлар ман канагатланаяк;
– баьри дережели бюджетлерге сезимли налоглар туьсеек;
– йыл бойынша планга коьре саьат сайын 100 млн. кВт электроэнергия болдырылаяк. Подстанция курылысы тамамланып, онынъ кулланувга берилуьви 2026-ншы йылдынъ 1-нши кварталынынъ ызына планланады.Проекттинъ яшавга шыгарылувы Дагестан Республикасынынъ кайтадан туьзилетаган энергетикадынъ оьрленуьвине эм энергетический беркликти арттырувга маьнели косым этеек. Дагестан Республикасында ясыл энергетикадынъ оьрленуьвине айырым эс каратады регион етекшиси Сергей Меликов. Республикада инвесторларга баьри власть дережелеринде де патшалык яклав бойынша коьплеген шаралар коьриледи.