Чернобыль, 26-ншы апрель 1986-ншы йыл. Бизим кайгылы эсимиз, юрек авырувымыз, соьнмес эстелигимиз. Сол каза болып оьткенли санавлы куьнлерден 40 йыл толады. Сонынъ ызларын тайдырувда сав элимиз бен бирге Дагестаннынъ, бизим Ногай районымыздынъ да айырым яшавшыларына катнаспага буйырык келген. Соьйтип оларды 40 йыл артта заман оьзи дуныяда энъ де авыр атомлы баьле-казадынъ алдын бувмага шакырган.
Янъыларда Ногай районынынъ Кара-Сув авылында ЧАЭС баьле-казадынъ ызларын тайдырувда катнасувшылардынъ бир куьбин бу мутылмас оьзгерис пен байланыста хош коьрип алдылар. Авыл маданият меканында эстеликли шара болып оьтти. Соны авыл маданият уьйининъ директоры Курмамбийке Ажманбетова ашып, саламлав соьзди «сельсовет Карасуйский» СП МО аькимбасы Амирбек Аруновка берди. Ол сол куьн авыл ерине конак болып келген район чернобыльшилери: Руслан Кунтувгановка, Бектемир Максутовка, Руслан Дильманбетовка, Юсуп Саитовка 40 йыл артта Чернобыль еринде оьз
аьскер борышларын йигитлерше толтырганлары уьшин разылыгын билдирди. Заманлар оьте берсе де, халк та, эл де Припять калада болып оьткен авыр катеди бир де мутып болмайды.
– Бизим Кара-Сув авылымыз кишкей болса да, мунда Уллы Аталык согысынынъ ветеранлары да, сонъында Афганистандагы, Шешен Республикасындагы, эндигиси СВО ериндеги дав аьрекетинде ортакшылык эткенлер де бар. Сиз муннан 40 йыл артта оьзлеринъизди аямай, патшалыгымызды, сав дуныяды атом увыннан аман калдырдынъыз. Бизден Чернобыльге 80-нши йылларда Эримбет Аджиманбетов, Руслан Кунтувганов, Юсуп Саитов кеткенлер. Соьйтип сиз бизим халкымыздынъ, йигит данъкын йогары коьтергенсиз, – деди авыл басшысы.
Амирбек Арунов авыл администрациясы атыннан йолыгыс катнасувшыларына савбол соьзин айтып, аьр бирисине шатлыклы аьлде Разылык хатлар тапшырды. Район чернобыльшилерге каратылган разылык соьзин авыл китапхана етекшиси Асият Тангатарова да айтты.
Ол ЧАЭС катнасувшыларынынъ кыйыны ман дуныядагы миллионлаган аьдемлердинъ яшавы байланыслы экенин айырым белгиледи. «Сондай авыр каза эндигиси бир де болмасын», – деген йоравын йорады. Асият Тангатарова чернобыльшилерген багысланган ятлавлардынъ бирисин окыды. Соьйтип шарада Кара-Сув авыл мектебининъ окувшылары да атом казадынъ алдын япкан баьтирлер акында ятлавларды яттан окыдылар. Окувшы Азизбек Джумагельдиев домбырада ойнап, белгили ногай композиторы Арсланбек Султанбековтынъ «Домбырам» деген йырын йырлады.
Район чернобыльшилери атыннан ЧАЭС катнасувшыларынынъ Ногай район советининъ председатели Руслан Кунтувганов эстеликли шарады уйгынлавшыларга разылыгын билдирди. Шарадынъ ызында чернобыльшилерди алгысламага деп Кара-Сув авыл СВО катнасувшылары Вагаб Османов
пан Рустам Мустафаевтинъ келгенлери баьрисининъ де коьнъиллерин коьтерди. Олар экевлери де чернобыльшилерге ийги йоравларын айттылар. Сол ерде Руслан Кунтувганов: «Бизди 40 йыл артта Элимизди саклавга заман оьзи сайлап шакырды. Аьли болса заман тап соьйтип сизди де СВО-га шакырды айырып. Ол зат биз баьримиз де Тувган Элимиздинъ аьскершилери, сонынъ коршалавшылары экенин аян коьрсетеди», – деп белгиледи. М.Ханов.
Суьвретлерде: авыл аькимбасы А.Арунов район чернобыльшилер советининъ председатели Р.Кунтувгановка Разылык хатты тапшырады; ЧАЭС эм СВО катнасувшылары.
