Элимизге фашист Германиясынынъ баскыншылык этуьви акында каты хабар, ердеслеримиздинъ аста-акырын барган яшавын бузып, аьр кимнинъ бактысына оьз себеплигин тийдирди. Уьйкенлер мен бирге яслар да Элин коршалавга турып, тувган-оьскен ерлерин калдырып, алдышылыкка явды сокпага асыктылар. Нариман авылындагы савлай элге белгили болган палван Сувык Эдильбаевтинъ увылы Абдул-Керимнинъ де арслан юрегинде явга карсы сезимлери кайнайды эм ол да фронтка кетпеге токтайды. Яс аьли де 18 ясына да толмаган болады, ол военкоматка барып оьз эрки мен согыска кетпеге аьризе язады. Мунда онынъ куьш-куватлыгын коьрип, Бас командованиединъ резервине косадылар. Оннан сонъ Абдул-Керим Сувык увылын Баку каласына офицер курсларына окымага йибередилер. Ястынъ мыратлары, ойлары баска эди, ама заман олардынъ несилин сайлады, тек оьз элин тувыл, савлай дуныяды нацизмнен куткармага.
Согыска дейимги тынышлы яшавда Абдул-Керим Эдильбаев мектебти окып тамамлап, бир йыллык бухгалтер курсларын оьткен. Сонъ колхозда счетовод болып куллык эткен. Авыл ясуьйкенлерининъ эсинде ол талаплы, исине мукаят, яваплы куллыкшы болып калган. Увылы билимли болып оьскенин суьйген Сувыктынъ, оьзек те, куьези уьйкен болган болар, тек йигитке язылганы баска эди – оьмирлерге халк эсинде баьтир кимик калмага.
1942-нши йылдынъ караша айында Абдул-Керим Эдильбаевти Сталинград фронтына мергин дивизиясына взвод командири этип йибередилер. Алдыда – кан тоьгисли, такыйка сайын коьплеген аьскер йолдасларды йойыткан, явга бетпе-бет турган кайнаган куьнлер. 18 ясында бизим коркынышсыз ердесимиз аьскершилер командири болады. Коьп куьнлер эм кешелер аьр бир орам эм аьр бир уьй уьшин бу калада согыслар боладылар. Мине 1942-нши йылдынъ караша айынынъ 23-нши куьнинде Паулюстынъ 6-ншы армиясы курсавга туьседи, эм немецлер оьзлери коршаланып баслайдылар. Бизим дивизия янъы аьскершилер мен толтырылып турады, мунда Кара тенъиз флотынынъ моряклары да йибериледи. Дивизия куьн сайын немецлерди уьйлерден, манъгазылардан, баска ерлерден шыгарув уьшин урыслар юритеди.
1943-нши йылдынъ биринши куьнинде бизим саперлар 89 метр узынлыгы болган ердинъ астыннан казув этедилер эм немецлер турган ерге ядыралар таслайдылар. Соьйтип «Баррикад» заводынынъ касындагы бензобаклар алынадылар. Бу урысларда бизим баьтир ердесимиз – лейтенант Абдул-Керим Эдильбаев те катнаскан. Паулюстинъ курсавга туьскен 6-ншы армиясын йок этуьв бойынша урыслар тамамланмага 5 куьн калганда, 1943-нши йылдынъ 27-нши январинде А.Эдильбаев баьтирше ян берген. Ол Мамаев курганда уьйкен кардаш камырында койылган, онынъ аты да сонда язылган.
Баьтир Абдул-Керим Эдильбаевтинъ элине суьйими эм Аталыгынынъ енъилмеслигине сеними негизинде яс несилди тербияламага тийисли. Сталинград коршалавшылардынъ йигитлиги савлай дуныяга белгили.
Нурият Кожаева.
Суьвретте: А.Эдильбаев.