Дагестан Республикасынынъ Аькимбасы Сергей Меликов пан Росавтодор етекшиси Роман Новиков араларында болган йолыгыста, «Инфраструктура для жизни» миллет проекти ишинде йоллар модернизациясы эм регионнынъ федераллык йол тармагынынъ оьрленуьви бойынша соравлар ортага салынып, ойласылды.
ДР Аькимбасы Сергей Меликов Дагестан ериннен оьтетаган «Сырт-Кубыла» коьлик коридорынынъ бек маьнели экенинде токтады. Онынъ билдируьвине коьре,
аьлиги заманда Хасавюрт эм Дербент калаларынынъ тоьгерегиндеги йоллардынъ курылыслары юредилер, а Махачкала каласынынъ тоьгерегиндеги йоллардынъ
курылысы – экспертиза этилуьв аьлинде. Биз йогарыда келтирген объектлердинъ курылысларын яшавга эндируьв коьп маьселелерди шешеек. Солай ок, Дагестанда
«Кавказ» трассасында капиталлык ярастырув ислер юредилер. Махачкала эм Дербент араларындагы он шакырымлы йол участогы 2026-ншы йылда кулланувга
берилеек. Дербент каласынынъ тоьгерегиндеги йолларда буьгуьнлерде юрип турган ярастырув куллыклар да алдыда автокоьлик айдавшыларга онъайлыклар
туьзеек. Сол курылыслар аркалы автокоьликлер эки боьлинип, калага кирмеге эм шыкпага болаяклар. Биз белгилеген йол участокларында этилмеге керек куллыклар баьриси де тийисли аьлде толтырылса, «Сырт-Кубыла» коьлик коридорында, сол йол кесеги ишине «Кавказ» Р-217 трассасы да киреди, автокоьлик айдавшыларга йолда бир кыйынлыклар да болмаяк. Сол куллыклар баьриси де 2028-нши йыл толтырмага ниетленеди.
Бу куьн «Инфраструктура для жизни» проекти ишинде ярастырылмага керек йоллар акында да соьйленди, 2025-нши йылдынъ ишинде республикада 142,2 шакырым региональлик эм муниципалитетлер араларындагы йоллар, сол санда 24 трасса, солардынъ 16 буьгуьнлерге ярастырылган, кулланувга берилеек.
Йолыгыстынъ сонъында Сергей Меликов Роман Новиковка оьз разылыгын билдирди эм республикамызда йол проектлерди яшавга шыгарувды колтыклаганы уьшин «За заслуги перед Республикой Дагестан» ордени мен савгалады.