Ораза байрамнынъ киели куьнлеринде «Казыят» саваплык фонды Дагестан Республикасынынъ Ногай районынынъ эм Ставрополь крайынынъ Нефтекум районынынъ колайлы яшайтаган аьеллерине уьйкен коьмек акциясын озгарды. Фондтынъ толтырувшы директоры Арслан Акбердиев «Шоьл тавысы» республикалык газетасына фитрсадакага йыйналган акшага азыклар алынып, пайланганы акында билдирди.
Саваплык фондыннан коьтергишлевди Ногай районындагы –160 эм Нефтекум районыннан 40-тан артык аьеллер алдылар.
– Ораза байрам – ол тек дин эм анъ-акыл яктан тазаланувдынъ заманы тувыл, ол касындагы аьдемлер акында каьр шегуьвге уьйкен маьне берилетаган куьн де болады. Биз коьмек заманы ман эм ярдамга керексингенлерге етсин деп шалысамыз, – деп фонд куллыкшылары белгилейдилер. Керексинген аьеллерге азыклар пайлав бир куьнлик акциясы юритилетаган уьйкен куллыктынъ кезеги болады.
Айтып озайык, фонд дайымлык негизинде «Ювыгынъ акында каьр шегуьв» социаллык проектин яшавга шыгарады. Проект бойынша колайлы яшайтаган аьеллерге юма сайын азыклар тапшырылады. Сондай аьрекет маьселеди бир кере этилинетаган коьмек пен ябув болып калмай, тезтез аьр бир аьелге эс этип ярдамласув болады.
«Казыят» саваплык фонды фитр-садака йыйнавда уьлис коскан аьр биревге разылыгын билдиреди эм «Ювыгынъ акында каьр шегуьв» социаллык проектинде дайымлык негизинде ювыгына коьмек этпеге суьйген аьр бирев катнаспага болатаганын эске салады.