Ногай районымыздынъ кенъ яйылган шоьлинде, еллер аьвелги таварыхлар акында хабарлап, аьр бир тоьбешик ата-бабаларымыздан калган сырларды саклап турган
ерде яшайды эм куьннен-куьнге оьседи бир аьлемет эр бала – Юсуф Шангереев. Ол – Куьнбатар авыл орта мектебининъ окувшысы. Ога бу куьнлерде 13 яс, ама онынъ аты бизге коьп сеним эндиреди эм алдыда тек уьстинликлер болаягына ынандырады.
Юсуф – тек ийги окувшы болып калмай, ийги спортсмен де болады, оны ман каьрлегени коьп те тувыл, ама аты оьз тенълери, куьндеслери арасында яркырап шыкты. Ол спорттынъ ММА кебинде уьстинликке етисти.
Бу куьнлерде ол оьзининъ куллыксуьерлиги мен «Спорт мастерине кандидат» деген атка тийисли болды, аьлиги заманга Ногай районымызда бу спорт кебинде
бир инсан да тийисли болмаган атты казанып.
Бу етискен уьстинлик тек сол оьрметли атты казанганын тувыл, онынъ айырым мыратка етисип болатаган касиетин коьрсетеди, йигиттинъ алдында коьп ниетлер
эм етиспеге керек дереже… Биз онынъ чемпион деп алган атын да коьрермиз…
Аьли уьшин де енъуьвлери аз тувыл: 2021-нши йыл – Юсуф спорттынъ эркин куьрес кеби бойынша республикалык турнирде, 2022-нши йыл – тайский бокс
бойынша Дагестан Республикасынынъ бириншилигинде, 2024-нши йыл сол ок ДР Бириншилигинде ММА спорт кебинде оьз куьшин сынады эм тек биринши орынларга тийисли болып турды.
Спорттынъ ММА кеби ога янъы эди, болса да, ол сол абыт ога уьйкен сый аькелди. Ол Россиядынъ кубыласында энъ де ийги спортсменлер санына кирди – чемпионат эм СКФО Бириншилиги ога уьйкен спортка йол ашты. Юсуфтынъ етимислерин белгилейтаган болсак, ол Россия калаларында оьткен сынавларда ортакшылык этип калмаган, Астана еринде оьткен чемпионатта да катнаскан, сонда да ол савгалы экинши орынга тийисли болган.
Юсуф Шангереев – янъы несилдинъ ваькили, спортсмени, сондай аьдемлер оьзлеринде анъ-акылды эм куватты бириктиредилер.
Ол янъыларда бизди, Москва каласында оьткен дуныя чемпионатында катнасып, алтын медалине тийисли болувы ман, оннан сонъ СВО барысында ян берген аьскершилердинъ эстелигине багысланган, Россия кубогына сынавларда енъуьвлери мен суьйинтти.
Юсуф ийги тамамларды коьрсетеди. Эгер аьдем оьзине, оьзининъ бажарымлыгына ынанса, коьп затка етиспеге болады. Юсуф – сондай аьдемлерден,
ол арымай-талмай ислеп турады, оьзининъ сулыбын байытады. Онынъ алдында – туьрли ерлерде турнирлер, аьли де етиспеген дережелер, сынавлар… Аьр кайсысы да ога етимисли болсын. Шангереев Юсуф – ногай спорттынъ келеектегиси, сол Ногай районынынъ Куьнбатар авылында, мектебте, класс боьлмесинде басланган, сонда энген ога мырат та – спорт чемпионынынъ алтын белбавы да. Биз ога сенемиз, алдыда тек уьстинликлер болар.
Амерхан Межитов.
Суьвретте: Ю.Шангереев.