Бизден кезекли Рамадан айы да кетти… Аьр ким де сол сыйлы айымыздынъ ишинде Кудайымыздан яде савга, яде Онынъ разы болмавын эм ашувын казанмага уьлгирди – соннан бизди Яратувшымыз Оьзи сакласын! Ким ди бирев, Ораза заманында оьзининъ тилин де эм колын да мусылманларга зарар этуьвден тыйып, Аллах пан йолыгыска саваплы ислер этпеге деп шалысты, баска бирев, оькинишке, соларды зарар этуьвден тыйып уьйренмеди.
Имам Муслим – Аллах оны Оьзи аясын – Абу Хурейрадан, Аллах оны ман макул болсын, Аллахтынъ Элшиси (ога тынышлык эм разылык) булай деп айткан деген соьзлерди йиберген: «Аьр бир дуьйсемби эм аьр бир киши юма куьнлерде Дженнеттинъ капылары ашыладылар, эм Аллах, бир-бирине яв болган экевден оьзге, Кудайга эш кимди де тенъ этпеген аьр бир кулын кеширеди. Эм маьлиеклерге айтылган: «Олар ярасканша, оларды койынъыз, олар ярасканша, оларды койынъыз, олар ярасканша, оларды койынъыз!» – деп.
Ораза-байрам куьнлеринде мен оьз ердеслериме, АллахТаалах бизди кешируьвди кери калдырмасын эм Онынъ Савабы бизим баьримизге де етсин деген ойым ман, аьр кимге де дин кардашларымыздынъ кими мен болса да яв болувды койганын, эски оькпелерди мутканын, оьш алув ойын таслаганын йорайман. Ердеги баьри де согыслар эм урыслар кутылсын эм аьскершилик йолында юрген аьдемлеримиз оьз кардаш-ювыкларына аман-эсен кайтсынлар деп Яратувшыга тилек этемиз. Аллах-Талла сизинъ туткан Оразанъызды эм ийги ислеринъизди кабыл этсин!
«Казыят» Саваплык фондынынъ председатели Р.Акказиев.