Балалыгымда ясуьйкен несилден неше кере де «Оттан, сувдан Кудай оьзи сакласын, сол экевиннен куьшли яв йоктыр» деген соьзлерди эситкенмен.
Сол шакларда бу соьзлердинъ кайдай куьши барын анъламайтаган эдим. Оьсе келе коьп затты анълайсынъ эм коьрип те келесинъ, сол заманда армаганда эситкен соьзлер де эсинъе туьседи эм кайдай теренъ ойларга да бизди коьмилдиредилер.
Республикамыздынъ тав якларында яшайтаган яшавшыларга бу куьнлерде аз зыян келмеди, табиат коьринислерине эм туьрленислерине коьре, коьплеген аьдемлер уьйлерин, яшайтаган ерлерин йойдылар.
Бу куьнлерде Дагестан Республикасында кыйынлыкларга етискен аьдемлер саны оьсти: куьшли ямгырлар себебин тийдирип, йылгалар ягаларыннан шыктылар, аьдемлер яшайтаган алты авылларында бир мынъга ювык турак уьйлер сувдынъ ишинде деп билдириледи.
Дербент районында болса, Геджухский сув саклавшыдынъ дамбалары йырылып, сув кырына тасып шыккан, кавыфлы ерден доьрт мынъ аьдем кавыфсыз ерге шыгарылган.
Республикадынъ бас каласы Махачкаладынъ да орамларында кавыфсыз тувыл, орамлар йылга кимик, сувга толган.
Айвазовский атындагы орамында алты шарлаклы уьйге тийип курылган уьш шарлаклы уьй омыраган. Наьсипке, зыян келген аьдемлер йок.
Ама сонынъ конъысы уьйлеринде яшайтаган аьдемлерге де кавыфсыз тувыл эди, сога коьре, соннан 300 аьдем сувдан куры ерге шыгарылган.
Дагестан Республикасынынъ Аькимбасы Сергей Меликовтынъ билдируьвине коьре, республикамыздынъ айырым ерлерининъ яшавшылары сондай аьлге калувына куьнали аьдемлер де бар, Тарнаирка йылгадынъ уьстинде уьйлер курувга ыхтыяр бергенлер.
Мамедкала авылдынъ янында «Кавказ» федераллык йолынынъ 917-нши шакырымында, йылга сувы коьтерилгеннен себепли, коьпир авган.
Республикадынъ Дербент каласында аьллер баьриннен де осал эди – тавдан каты агын туьскен. Ерли яшавшылардынъ бир нешеви сувдынъ моллыгыннан уьйлерининъ капыларын аша алмай, куткарувшылардынъ келуьвин карап турганлар.
Казага калган яшавшыларга тийисли ярдам этиледи, патшалык яктан колтыклав да болады. Регион етекшиси С.Меликов Махачкалада, каза болган ерлерге барып, оьз коьзи мен де коьрген. Аьр кайсысы бойынша да тийисли карар алынады.
