Хатын-кызлар байрамы яркырап келди аьр бир уьйге. Оны язлыктынъ, ярасыклыктынъ куьни деп босына айтпаймыз. Кыстынъ аязлы куьнлериннен сонъ табиат кайтадан коьркленип, куьш алады, биринши шаьбден ийгиликтинъ, янъылыктынъ белгиси болып, савлай дуныяды сукландырады. Сол куьн биз де янымызга якын хатын-кызларды, аналарымызды, кызларымызды, аьптей-синълилеримизди байрам ман кутладык.

Солардынъ бириси – Карагас авылынынъ бийкеси, оьз исине алал, бактысына разы хатын Альфия Танбулат кызы Шабанова. Альфия Карагас авылында тувып-оьскен, мунда мектебти битирип, окымага Владикавказ каласына техникумга туьседи эм «бухгалтер» кесписин байырлайды. Болса да, яс кызалак юрегинде аьдемлерди эмлемеге суьетаган мыратын саклайды. Сол ой-мырат Альфияды Кизляр каласындагы медучилищесине аькеледи. Окувын битирип, яс специалист тувган авылына кайтып, ерли больницасында медсестра болып ислейди. Сонъында Альфия Танбулат кызы «тезлик ярдамы» боьлигине шыгады, буьгуьнге дейим сонда аьрекетин бардырады. Авылшылардынъ айтувы ман, Альфия Шабановады оьзин «тезлик ярдам» деп айтпага болады. Онынъ бавырмалы юреги де, оьз куллыгын ийги этип билуьви де – эм. Тек ийне урув, дарман беруьв тувыл, ийги соьзи мен авырыйтаганларга карайды медсестра. Коьплеген йыллар ислейди ол, сол йыллардынъ ишинде авылшылар, ис йолдаслар арасында сый-абырай казанган.
Буьгуьнлерде юрегинде бир де таркамастай кайгы болса да, Альфия Танбулат кызы яшавынынъ бас орынына суьйикли исин, кызын Алияды, увылы Бесланды, йиенлерин салып, Кудайына да, бактысына да разы болып яшайды. Онынъ тунъгышы, баласынынъ басы Ислам Шабанов бизим шынты баьтирлеримиздинъ бириси болады. СВО еринде йигитлерше согысып, Аталыгын коршалавда ян берген ясларымыздынъ аналарынынъ алдында биз басымызды ийип, коьп савбол айтамыз. Мен коьплеген йыллардан бери бизим оьнерли Зульфия Аджигеримовады таныйман, оны танымаганлар аз болар.
Оьз синълиси Альфияга ол аьр заманда да тирев, яндавыр болып турады. Кыйынлы куьнлерде де аявлап, синълисининъ кайгысын ортак боьлди. Сол да сейирли тувыл. Бир анадан тувган аьвлетлер бирбирисине янын да, канын да бередилер.
Кайзаманда да биринши бала анага юмсак болады. Ислам да анасын аявлайтаган эди. Аьдемнинъ яшавында кайдай аьллер де болып калады, сондай заман Альфия Танбулат кызы Исламнынъ коьтергишлевин сезетаган эди. Мен ойлайман, аьли де Ислам, ак малек болып, анасын баьри баьле-казадан саклайды.
Альфия Танбулат кызына баьри ийгиликлерди йорайман. Яраланган ана юрекке саьбийлеринъиздинъ, йиенуныкларынъыздынъ куьлкиси, язлыктынъ йылы нурлары эм болсын. Сондай баьтирди оьстирген хатыннынъ куьшли касиетлери бу яшавдынъ куьезин коьрмеге амал береегине шекленмеймен.
Г.Бекмуратова.
Суьвретте: А.Шабанова.