Бизим кургаклы табиат аьллеринде бир теректи оьстируьв – ол уьйкен ис, сав паркты олтыртув эм оьстируьв – ол йигитлик. Суьйинишке, аьлиги
заманларда хыйлы аьдемлер соны анълап баслаганлар, эм сондай саваплы иске кирисип, оьз коллары ман оьз орамларын эм авылларын ясылландырадылар.
Ногай районнынъ административлик орталыгы Терекли-Мектеб авылдынъ алдынгы аькимбасы Арслан Байманбетов (Алла ога тынышлык берсин) аьли де 2010-ншы йылларда Терекли-Мектеб авылдынъ куьнбатар-сырт япсарында К.Кидирниязов эм В.Мокринский атындагы орамлар ортасын коралап, мунда Чернобыль катнасувшылары ман Афганистандагы согыс ветеранларынынъ сыйына багысланган парк курып баслаган эди. Сонынъ уьшин ол ювыктагы кум этегинде артезиан да каздыртты.
Буьгуьнлерде сол артезиан бу орамлардынъ яшавшыларын сув ман канагатлайды. Болса да бир неше йыллар артта бу ер кесеги авыл администрациядынъ
тергеви астыннан тайып, сол парктынъ шетенлери бузылып, олтыртылган яс тереклер каравсыз калып курыдылар.
Эндигиси бу куьнлерде район орталыгынынъ бу яктагы орамларынынъ яшавшылары ТереклиМектеб авыл Депутатлар йыйынына сол паркты кайтадан олтыртув керек эди деген соравы ман барган эдилер. Сол соравды ойласып карап, авыл администрациясынынъ басшысы Марат Кулунчаков эм авыл
Депутатлар йыйынынынъ председатели Мурзадин Яриков паркты кайтаданкурувга карар шыгардылар эм акша карыжын да белгиледилер.
Янъыларда мунда орам ортасындагы заьлимдей кенъ ер участогына К.Кидирниязов, В.Мокринский эм Р.Заргишиев атындагы орамлардынъ яшавшыларынынъ
куьшлери мен парк уьшинянъы кора этилинди.
– Бу ер участогынынъ майданы 1,8 гектар болады. Мунда яс тереклер олтыртылаяк, тротуарлар, янъы балалар майданы курылаяк, – дейди паркты кайтадан курув планлары акында Мурзадин Яриков.
Оьз микрорайонында парк оьстирмеге деген бу яктагы орамлардынъ яшавшылары оьз ыхтыяры ман сол исти баслаганын, биревлери сол ниет пен оьз карыжларын да бергенлери акында белгилемеге керек деп ойлайман. Соны ман мунда ювык заманлар ишинде тагы бир яс парктынъ тереклери шувылдасар
деп сенимли кепте уьмит этпеге болаякпыз.
М.Юнусов.
Суьвретте: парк уьшин янъы кора курылады.
