Дагестан Аькимбасынынъ куллыгын юритуьвши Федор Щукин Москвада Элимиздинъ Президенти Владимир Путинге республикада туьзилген аьллер акында хабарлаган. Айырым маьне ол оьз соьзинде аьдеттен тыскары аьллердинъ ызларын тайдырувга эм согыс спецоперациясынынъ катнасувшыларын эм олардынъ аьеллерин социаллык яктан колтыклав шараларын яшавга шыгарувга караткан.
Регион етекшиси патшалыктынъ басшысына сув тасувдан кыйынлык коьрген ерлерде кайтадан курылыс ислерининъ юриси, гражданларга материаллык ярдамын тоьлев эм яшав аьрекетин толы кепте тийисли аьллерге келтируьв уьшин керекли техникады эм ресурсларды кулланув акында билдирген.
Йолыгыстынъ заманында СВО катнасувшыларын эм олардынъ аьеллерин колтыклав, оларга адреслик ярдамын, эм социаллык коьмегин этуьв, тоьлевлер, реабилитация эм СВО-дан кайтып келген аьскершилерди ис орынларына ерлестируьв соравларына артык эс берилген.
Щукин Элимиздинъ етекшисине Дагестанда СВО ветеранларынынъ уьйин курув акында карар алынганын айткан. Сол уьй аьскершилерге эм олардынъ ювыкларына коьмек этетаган организацияларды бирлестиреек. Путин бу ойды хош коьрип алган.
Патшалыктынъ басшысы ман бирге федераллык демевлиги керегетаган тармак маьселелерин де, сонынъ эсабында коммуналлык эм коьлик инфраструктураларын янъыртув, миллет проектлерди яшавга шыгарув эм экономикадынъ бас тармакларына инвестицияларды келтируьв соравлары да ойласылган.
Оннан баскалай, Федор Щукин Владимир Владимировичке уллы дагестанлы Расул Гамзатовтынъ асабалыгына айырым эс бергени уьшин юрек разылыгын билдирген. «Биз баьримиз де Президенттинъ Дагестанга эм дагестанлыларга айырым йылы сезими мен каравын билемиз. Аьр заман да эм аьр бир ерде де биз ярдам этилинуьвин сеземиз – баьле-казадан сонъ аьдетли яшавга кайтувдан алып аьдемлердинъ яшав сапатын арттырувга каратылган уьйкен оьлшемли проектлерди яшавга шыгарувга дейим.
Владимир Владимировичке бизим ой-кенъеслеримизди колтыклаганы уьшин эм бизим республикага дайым да маьне берип турувы уьшин разылык билдиремен», – деген Федор Щукин йолыгыстан сонъ.