Аталыгымыз аьр кимнинъ юрегинде де бас орынды тутады. Буьгуьнлерде аьскершилеримиз, Элимиз парахатлы яшап, беркип эм оьрленип келсин деп, патшалыгымыздынъ кызыксынувларын коршалав ниетте, согыс борышларын тийисли толтырып келедилер. Россия, онынъ шакырувына бириншилерден болып коьтерилген тийисли эм йигит аьдемлерин, тербиялап оьстирди. Сол алал йигитлер, элининъ уьстинде авыр шаклар тувганда эш ойланмай, тынышлы яшавын коршалавга атландылар. Сондай йигитлер акында аьр ким де билмеге тийисли. Олар патшалыгымыздынъ диреги болып, келеектеги несиллер уьйренеек аьлиги заманнынъ тарихин туьзип келедилер. Юма сайын биз газетамыздынъ бетлеринде, оьз яшавларын аямай келетаган, ызгар окопларда эм блиндажларда, ялынлы йолларда оьз элининъ кызыксынувларын коршалап келетаган йигитлеримизди оьрметлеп язамыз. Каты урыслар барысында эм алдышылык сызыгында атлары халк эсинде дайымга сакланаяк шынты баьтирлери тувадылар. Сондай йигитлердинъ бириси болады Ногай районынынъ Терекли-Мектеб авыл яшавшысы, коркынышсыз ердесимиз Фарохидин Фарходович Ибрагимов. Фарохидин асылы ман Ставрополь крайынынъ Нефтекумск каласыннан. Ол Фарход эм Гульжана Ибрагимовлардынъ коьпбалалы аьелинде экинши аьвлет эди. Бала шагыннан онда яваплылык, шалыскырлык, касындагыга ярдамга барув касиетлери кепленип эм тербияланып келдилер. Яс Терекли-Мектеб авылынынъ А.Х.Джанибеков атындагы орта мектебинде 9-ншы класска дейим окып билим алган. Оьз тенъ йолдасларындай болып, Элимиздинъ бас каласы Москва, Норильск калаларына кетип, яшавды танып, кылык-касиетлерин шыныктырып, куллык этип келди.
Аьскер сырасыннан сонъ, Фарохидин бактысын сынаган токтасты алады, ол РФ Коршалав министерствосы ман контракт басып, согыс спецоперация юрген ерге йол алады. Ол, шынты йигитликти талаплаган, Аталыкты коршалавшы кесписин сайлады. Соьйтип, ердесимиз, 2025-нши йылдынъ кырк кийик айынынъ ишинде согыс спецоперация юрген ерде душпанга карсы шыкты. Буьгуьнлерде ол алдына салынган согыс борышларын Запорожье еринде ава-десант аьскерининъ артиллериялык бригадасы тизиминде йигитлерше толтырып келеди. Фарохидин уьйде калып, кардаш-тувганларынынъ, тенъ-досларынынъ касында болып, тынышлы яшавы ман яшамага да болар эди, ама ол эли алдында борышын толтырув йолын сайлады.
Буьгуьнлерде йигит ердесимиз авылларды эм калаларды кара ниетли явдан босатувда, онынъ тынышлы яшавшыларын неонацизмнинъ коркынышлы идеологиясыннан коршалавда белсенли катнасады. Элимиздинъ ярык келеектегиси эм йогарымыздагы таза эм тынышлы коьгимиз уьшин куьресуьв – аьскершидинъ согыс спецоперация еринде куьндегилик иси. Яшавынынъ бир йылын ызгар эм мылтыготтынъ ийиси кокыган окопларда озгарганы, аьскершидинъ эркин эш сындырмады.
Аьр бир аьдемнинъ яшавында юрегине ювык эм эсинде дайымга сакланган ерлер бар. Согыс спецоперация катнасувшысы Фарохидин Ибрагимов уьшин сол ер – онынъ тувган мектеби. Янъыларда ердесимизге, кыска болжал заманга тыншаювга келип, сол баалы куьнлерин суьйикли анасынынъ, аьелининъ, досларынынъ, кардаш-тувганларынынъ тоьгерегинде озгармага бакты буйырды. Бу ердесимиздинъ согыс спецоперация юрген ерден уьйине экинши кере тыншаювга келуьви болды. Фарохидиннинъ тувган Терекли-Мектеб авыл орта мектебинде онынъ класс етекшиси Лейла Делибиевна Сагиндикова ман уйгынланган йолыгыс окувшылар уьшин шынты йигитлик дериси болды. Кыста оьткен сол йолыгыста аьскерши окувшыларга оьзининъ сайлавы, Аталыкты коршалав ман оьз яшавын не уьшин байланыстырганы, СВО юрген ерине барувыннан алдын не ерде аьзирликлер коьргени, алдышылыктагы биринши сынавлары акында хабарлап эситтирген. Сол куьн Фарохидинге мектебте юма сайын озатанган линейкада Россия байрагын коьтермеге де ыхтыяр берилди. Ога карап окувшылар «Эл», «намыс», «борыш» деген анъламлары бос соьз болып калмай эм оьз коьз алдында тек мектеб выпускнигин тувыл, тувган элининъ шынты коршалавшысын эм патриотын коьрдилер. Буьгуьнлерде Фарохидин Ибрагимовтай ясларымызды биз оьз заманымыздынъ йигитлери деп санаймыз. Неге десе уьйиннен алыста, согыс спецоперация юрген ерде, ол эм онынъ согыс йолдаслары куьн сайын бизим тынышлыгымызды коршалап эм коьптен саклаган енъуьвимизди ювыклатып келедилер.
Биз ердеслеримиз бен оьктемсиймиз. Фарохидиндей ясларымыз – бизим сенимимиз эм тиревимиз. Олардынъ тиресуьвлиги, йигитлиги эм берген антына алаллыгы – аьдемлердинъ юрегинде ата-бабаларымыздынъ ийги аьдетлери буьгуьнлерде де яшап келуьвининъ ыспатлавы болады.
Биз баьри коршалавшыларымызга, сонынъ ишинде Фарохидинге де, уьйлерине коьптен сакланган енъуьв мен, аман-эсен кайтканларын йораймыз.
Г.Нурдинова.
Суьвретте: Фарохидин Ибрагимов.