Оьткен саьли куьн «село ТереклиМектеб» СП МО аькимбасы Марат Кулунчаков ДР Халк Йыйынынынъ председателининъ орынбасары Камил Магомедович Давдиев эм республика парламентининъ Спорт, туризм, маданият бойынша комитетининъ председатели Мурад Магомедович Пайзуллаев пен ис йолыгыслар озгарды. Йолыгыслар барысында район орталыгын оьрлентуьв, биргелес аьрекет этуьв эм муниципаллык туьзилислерин оьрлентуьв программаларын яшавга шыгарувда ДР Халк Йыйыны ягыннан колтыклав соравлары ойласылды. Солай ок ДР-нынъ экономика эм территориаллык оьрленуьв министрининъ биринши орынбасары Адильхан Жамалханович Ахмедов пан ис йолыгысы болып оьтти. Ортага салынып ойласылган бас тема – Дагестан Республикасында «Ерли баславлар» проекти. Ол яшавшылардынъ белсен катнасувы эм республика бюджети ягыннан колтыкланув аркасы ман ямагат инфраструктурасын оьрлентуьвге каратылган. Проект ДР Оькиметининъ «Дагестан Республикасы еринде ерли баславлар проектлерин яшавга шыгарув акында» Токтасы ман (25-нши апрель 2016-ншы йыл, №110) келисте яшавга шыгарылады. Марат Кулунчаков белгилегенлей, конкурста катнасувдынъ бас шартларынынъ бириси – проектти муниципаллык туьзилисининъ бюджетиннен финанслав эм меценатлар амаллары аркасы ман яшавга шыгарув. Соны ман бирге конкурста тек муниципаллык районлар эм кала округлар тувыл, республикадынъ авыл эм кала поселениелери де ортакшыламага боладылар