Элинъ, Аталыгынъ, Ата юртынъ, камыс ябылган кишкей уьйинъ (аьлиги заманда ондай уьйлер тек суьвретлерде…), баьриси де калай аявлы. Боьтен де сол затлардынъ баасын узакка кеткенде, ят якларда болганда сезесинъ… Элимизде аьли тыныш тувыл заманлар, йырткышламага аьзир болып, яв шабады, тынышлы яшавды, куьнасиз халкты коршалавга турды эр йигитлер. Согыс спецоперациясы юрип турады, сол басланганлы да аз заманлар тувыл, йойымлар да, уьстинликлер де бар. Баьтир атлы йигитлердинъ данъкы да бар. Сол санда бизим кишкей ногай халкымыздынъ йигитлери де оьзлерининъ ийги атларын ататадылар. Сагынады шоьлде тувып-оьскен яслар боз ювсаннынъ ийисин, ак кырав туьскен анайдынъ шашынынъ туьсиндей кылганын… Ногай районымыздынъ конаксуьер, ата-бабадан калган аьдетлерди сыйлап, асаба этип, несилденнесилге берип болатаган Куьнбатар авылында тувып-оьскен йигит Назир Абукер увылы Юмакаев те элди явдан коршалавга шыкты. Оны таныганлардан Назирдинъ касиети акында сораганда, коьбисининъ явабында – Бек каьмбил йигит, – деген соьзди эситтим. Назирдинъ аьскерлик йолы акында мага онынъ суьйикли анасы Вайдат-абай хабарлады. Назир Абукер увылы оьз ыхтыяры ман Екатеринбург каласында Россиядынъ коршалав министерствосы ман контрактлы аьрекет бардырувга колын баскан. Ога дейим йигитимиз элдинъ сырт якларында аьрекет бардырган. Бу куьнлерде Назир Юмакаев – согыс спецоперациясынынъ белсенли катнасувшысы, куьн сайын ол енъуьвди ювыклатувга куьшин салады, согыстынъ Добропольский йорыгында яв ман куьреседи. Ол оьзи кызмет кылатаган аьскер боьлигининъ материаллык канагатлав бойынша батальонынынъ коьлик ротасынынъ тамада водители болады. Йигит ердесимиздинъ аты ийгилер сырасында, уьстимиздеги йылдынъ август айында Назир батальон етекшилери мен «Юма аьдеми» этилип белгиленди. Олай дегеним, бир айырым юма ишинде ол оьзине тапшырылган борышты яваплы аьлде, бир йойымсыз толтырган. Олардынъ аьскер боьлигинде сондай ийги аьдет бар экен, айырым кесек заман ишинде оьз аьрекетин ийги толтырса, ол сол заманнынъ аьдем деген атка тийисли болгандай болады. Сол аьдемнинъ суьврети, эткен куллыгы акында язылып, туьрли ерлерде белгиленеди. Аьли меним алдымда бизим Назир йигитимиз акында билдируьв бар, сонынъ иштелиги мен сизи мен боьлисемен (суьвретин коьрсетпеймиз, неге десе аьскер боьлиги акында тувра билдируьвлер бар): –… аьскер боьлигининъ материаллык канагатлав бойынша батальонынынъ коьлик ротасынынъ тамада водители киши сержант Назир Абукерович Юмакаев оьткен юма ишинде оьзининъ терен билими эм сезгирлигин кулланып, кавыфлы аьллерде 52 автокоьликти ягарлык пан канагатлаган. Сол тувыл ма йигерлик эм йигитлик деген, кыйынлыкларга карамастан, оьз борышын толтырса… Назирдинъ анасынынъ билдируьвине коьре, онынъ коьплеген Сый грамоталары, етекшилеви атыннан Разылык хатлар уьйде аявлап сакланылады. Тезден «За мужество» медали де берилеек деген ийги хабарлар келедилер. Сога да шак етер, шекленмеймиз. Назирдей ясларымыз аз тувыл, ама аьр бирисининъ аты бизге баалы. Бизим миллетимиз коьп санлы да, аз санлы да тувыл, туьрли ерлерде шашырап яшаймыз, атымыз да тарихте белгили, оьктемсигендей аьлимлеримиз де, оьткен оьмирлерде палванларымыз да, йыравларымыз да болган, ама буьгуьнги тарихти туьзеди Назирдей йигитлеримиз. Куьтемиз оларды енъуьв мен, саклайды оларды ак тастарлы аналары, юреклери мен суьйген аталары, увыздай увыллары, кызлары, ярасык хатынлары… Сакласын йигитлеримизди тек бир Алла-Таалла. Келер енъуьв Элиме, кайтар йигитлер куьз шагында – ак кылганлы, язлыкта – боьригоьзли шоьлиме…

 Галима Сагиндикова, РФ Журналистлер союзынынъ агзасы. Суьвретте: Назир Юмакаев.