Россия элимизде кесек болжалга тыншаювга келген яде эмленуьвде болган согыс спецоперация катнасувшылары ман окувшылар йыйы йолыгыслар озгарып келедилер. Янъыларда Коясыл авыл маданият уьйинде аьрекетлейтаган «Территория добра» клубынынъ агзалары согыс спецоперация катнасувшысы ман йылы йолыгыс озгардылар. СВО катнасувшысы Михаилдинъ анасы Татьяна балалардынъ уьйине келгенине уьйкен суьйинишин билдирдилер. Эмленуьвде болган согыс спецоперация катнасувшысы уьшин сол йолыгыс – ямагат ягыннан уьйкен эс эм разылык белгиси эди. Михаил ети ясында атасыннан калган. Мектебте билим алып, оьз мырадларын яшавга шыгарып келген яс. Эли уьстинде коркынышлык тувганда, Россия Федерациясынынъ Коршалав министерствосы ман согыс спецоперациясында катнасув уьшин контракт беркитип, Элининъ кызыксынувларын яклап келеди. Буьгуьнлерде ол оьз согыс йолдаслары ман тувган ерин, оьз кардаш-тувганларын, Элин йигитлерше коршалап келеди. Алдына салынган согыс борышын яваплы толтырганы уьшин аьскерши яс «За отвагу», «За боевые отличия» патшалык савгаларына тийисли этилген. Йылы йолыгыстынъ барысында СВО катнасувшысы конакка келген балалардынъ соравларына толы яваплады, россия аьскершилеримиз кайдай аьллерде согысып келетаганлары, олардынъ яшав аьллери акында кызыклы хабарлады эм олар ювык арада Енъуьв мен кайтаякларына сенимин билдирди. Мектеб окувшыларына сондай патриотлык йолыгыслары – согыс спецоперацияда катнасатаган йигиттинъ авызыннан эрлик, согыс борышы, Элге суьйим эм сондай баска затлардынъ акында эситип, коьзлери алдында тарихти янландырмага амал береди.