9-ншы декабрьде Россияда эстеликли куьн – Аталык Баьтирлерининъ куьни белгиленеди. Бу куьн биз элимиздинъ тарихининъ туьрли заманларында онынъ
эркинлиги эм оьрленуьви уьшин йигитликлер эткенлерди оьрметлеймиз.
Аталык Баьтирининъ куьнинде Кадрия атындагы мектебинде шатлыклы линейка озды эм Баьтирлер парталары ашылды. Шарага Ногай район Согыс эм ис, Савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиев, «Шоьл тавысы» республикалык газетасынынъ бас редакторы Эльмира Кожаева, Россия Журналистлер союзынынъ агзасы, согыс оьзгерислер катнасувшысы Елена Жукова, СВО катнасувшылары Камиль Атангулов, Эльшар Муслимов, Аджибай Исмаилов, олардынъ эм баска СВО катнасувшыларынынъ ата-аналары, атайлары, тетелери,
хатынлары, аьптелери эм баскалар шакырылдылар.
Сыйлы конакларды мектеб етекшиси Альфия Акимова хошлап, оьз соьзинде доьрт йыл узагында мунда баьтирлер парталар ашылатаганын эм оларга окувда
эм тербияда оьзин тек ийги яктан коьрсеткенлер олтыратаганын белгиледи. Акманбет Сангишиев Баьтирлер ол тек орденлер мен савгаланганлар тувыл, оьз Эли уьшин янын аямаганлар эм бу куьнлерде СВО барысында элининъ бойсынмаслыгын коршалаганлар да сол сыйлы атка тийисли экенин белгиледи. Елена Жукова аьр бир несилге авыр сынав берилетаганын, туьрли согысларда йигитлеримизге Эли уьшин турмага керек болатаганын айтты. СВО катнасувшысынынъ тетеси Курасхан Абуевна сосындай ийги йолыгыс озгарганлары уьшин мектеб етекшилевине уьйкен разылыгын билдирди.
Йолыгыс барысында шара юритуьвшилер тербиялав бойынша етекшидинъ маслагатшысы Алтынай Сулейманова эм педагогпсихолог Динара Заргишиева СВО
барысында яс янларын аямаган ердеслеримизди атларын эм яшавынынъ ызгы куьнин айттылар.
Соны тынълав оьзек те, йыйылганлардынъ аьр кайсысына да авыр эди. Сонъ йыйылганлар яшавлары курман болган йигитлер эстелигине бир такыйка уьндемей турдылар. Шарадынъ шатлыгын Юнармеецлер катнасувы арттырды. Бу куьн олардынъ сыраларын толтырылувы ман байланыслы оьзгеристинъ де йыйылганлар шайытлары болдылар.
Шарадынъ энъ де шатлыклы кезеги – он эки Баьтирлер парталар ашылувы эди. Оларга баьтирлердинъ балалары, ювыклары олтырдылар.
Баьтирлер куьни баьри несиллерди бирлестиреди, элимиздинъ озганын эм келеектегисин байланыстырады. Биз туьрли несиллер баьтирлерин эсимизде саклаймыз, оьз яшавын аямай Енъуьвди ювыклаткан СВО катнасувшыларына уьйкен савбол айтамыз. Сондай аьдемлер аркалы элимиз Россия уллы болган эм болады. Бу куьн биз оьрметлеген йигитлердинъ эрклиги яс несилди Аталыгына намыслы куллык этпеге даьвлендирер.
Нурият Кожаева.
Суьвретте: шатлыклы шарадан коьринис.
