Кырк кийик айынынъ 26-ншы куьнинде «Шолпан» балалар бавынынъ азбарына шав-шувласып ян-яктан, коьнъил куванышка толып, халк йыйылып баслаганлар. Бу куьнлерде «Шолпан» балалар бавы 60 йыллык мерекесин белгилейди. Мереке – ол ислерди тамамлав, етимислерди коьрсетуьв, алдыда салынган борышларды толтырув. Яшавдынъ коьп туьрленислери мен оьтти «Шолпан» балалар бавынынъ уьйкен йолы.
Соьйтип, оьседи тербиялавшылардынъ сулыбы, ийгиленеди материаллык негизи, янъы технологиялар ман бирге абытлавы.
Биринши кере балалар бавынынъ эсиклери 1965-нши йылдынъ сары тамбыз айынынъ 10-ншы куьнинде ашылган. Сол йылларда «Чебурашка» атындагы балалар бавын Казна Индирбай кызы Ярикова басшылаган. Мине 60 йыл узагында саьбийлердинъ куьлкиси, завклы сеслери занъырап бу куьнлерде де эситиледи азбарда. Аьр бир баладынъ коьнъилине тек ийгиликти, акыйкатлыкты, суьйимди эндирип ислеген мунда тербиялавшылар.
Шарада «Ногайский район» МО аькимбасы Д.Эсиргепов, «Шолпан» балалар бавынынъ алдынгы тербияланувшысы, Нариман авыл администрациясынынъ етекшиси З.Суюндиков, Ногай районынынъ согыс эм ис ветеранлар советининъ председатели А.Сангишиев, УО методистлери М.Гапарова, Н.Кельдасова катнастылар. Хошлав соьзи мен келген конакларга «Шолпан» балалар бавынынъ етекшиси Марина Танъатар кызы Искакова шыгып соьйледи. Балалар бавында ислеген ветеранларды да эске алдылар, олардынъ иси акында хабарладылар.
Конакларга концерт программасы аьзирленген, тербиялавшылар, балалар оьз оьнерлерин коьрсеттилер Бу куьнлерде «Шолпан» балалар бавы аьлиги заманнынъ ФОП программасы бойынша бирге барады, куьн сайын куллыклар юритиледилер. Бир куьпте ойынлар, эртегилер яде болса, спорт алатларында янъы сынавларды оьтедилер, баскалар суьвретлер ясайдылар. Тербиялавшылар туьрли конкурсларда, выставкаларда катнасадылар. «Шолпан» балалар бавын сыйлы мереке мен кутлап, коьп ийгиликлер, етимислер йораймыз.
Джамиля Аманбаева,
«Ногай Эл» балалар бавынынъ тербиялавшысы.
Суьвретте: шарадан коьринис.