Йыл сайын кырк кийик айынынъ 27-нши куьнинде Россияда мектебке дейимги билимлендируьв куллыкшыларынынъ эм тербиялавшыларынынъ байрамы белгиленеди. Бу куьн Россия Президенти Владимир Путин мен 2004-нши йылда беркитилген. 1863-нши йыл СанктПетербургта биринши балалар бавы ашылган. Школага дейимги билимлендируьвдинъ куллыкшыларынынъ акыллыгы, шыдамлыгы, юрегининъ ийгилиги саьбийлерге йылувлык савкатлайдылар.
Тербиялавшыдынъ иси – куьндегилик кыйынлы куллык, ол бавырмалы ана, ийги дос, акыллы насихатшыокытувшы болув керек. Аьр бир аьдем ийги тербиялавшы болып болмайды. Балалар язувшысы, совет окытувшы В.Сухомлинский айткан:
«Балаларга шынты тербиялавшы болар уьшин оларга юрегинъди савкатламага керек». Тербиялавшылар байрамын беркитуьв – социаллык институтларды оьрлендируьв эм балалыкты коршалав областинде мектебке дейим билимлендируьвдинъ сыйын эм тербиялавшылардынъ исин коьтеруьвде маьнели
абыт. Бу куьн коьп шаралар озгарыладылар, район, республикалык, Россия дережесинде мектебке дейимги билимлендируьв куллыкшыларына
сый этилинеди.
Орта-Тоьбе авылынынъ «Юлдуз» балалар бавынынъ тербиялавшысы Кабират Нурманбет кызы Нурманбетова саьбийлер мен 1982- нши йылдан алып ислейди.
Ол коьплеген йыллардынъ ишинде балалар, ис йолдаслары эм ата-аналар арасында оьзининъ ийги иси мен сый-абырай казанган. Баьри билимин, юрегининъ йылувын, суьйимин савкатлайды Кабират Нурманбет кызы оьзининъ суьйикли исине. Хатын коьплеген Сый грамоталарга тийисли болган. 2023- нши йыл бажарымлы куллыкшы «Дагестан Республикасынынъ Халк билимлендируьвининъ отличниги» деген сыйлы атты казанган. Биз баьримиз де Кабират Нурманбетовады, онынъ ис йолдасларын, районымыздынъ мектебке дейимги билимлендируьвининъ баьри куллыкшыларын кеспи байрам ман кутлап, исинде бийикликлер эм енъуьвлер сагынамыз.
Г.Бекмуратова.
Суьвретте: К.Нурманбетова.