Ана куьни – энъ де йылы эм суьйимге оралган байрам. Онынъ уллы эм шынты маьнеси, согыс спецоперациясы басланып, бизим йигитлер колларына савыт алып, Элин коршалавга турганнан сонъ, коьринди. СВО барысында Россиядынъ увыллары, солардынъ сырасында бизим ердеслеримиз де эрклик, шыдамлык эм баьтирлик коьрсетедилер. Оькинишке, олардынъ арасында яшавлары курман болганлар да бар. Бу баьтирлерди тербиялаган аналар алдында басымызды иемиз. Оларга увылларынынъ баьтирликлери акында эсти саклав ман байланыслы ниет яшамага куьш береди.
Ана куьнининъ алдында орталык китапхана «Сав дуныяга мен аьскершидинъ анасы деп, эситтирермен!» деп аталган шарады район администрациясынынъ Яшавшыларды социаллык яктан канагатлав орталыгынынъ, Яшавшыларды социаллык яктан коршалав управлениесининъ эм Ногай районында Сырт территориаллык округы бойынша ДР юстиция министерствосынынъ ЗАГС управлениесининъ коьтергишлеви мен, СВО барысында янын берген аьскершилердинъ аналарына багыслап, озгарды. Солай ок йолыгыста ДР Ямагат палатасынынъ агзасы, район Хатын-кызлар советининъ председатели Асият
Манкаева, район администрация ваькиллери, КЦСОН эм УСЗН куллыкшылары катнастылар.
Катнасувшыларынынъ юрек сезимлерин козгамай болмаган ийги шарады китапхана куллыкшысы Арина Якубова ашып, юритти. Ол мунда йыйылган
Эли уьшин янын аямаган йигитлердинъ аналарынынъ атларын айтып, олардынъ увылларынынъ акында хабарлады. Китапхана куллыкшысы баьтир-ердеслеримиз аьзиз аналарына язган хатлар сыдыраларын да окып эситтирди.
Берекетли сыпыра тоьгерегинде олтырган хатынлар юрек сызлавы ман увыллары акында эскеруьвлери мен боьлистилер. Аналар коьзяслары ман мундай йылы йолыгыслар, коьтергишлев, эс этилуьв, гуманитарлык юклер йыйнавда ортакшылык этуьв оларга авыр ойларды коймага ярдам этетаганын айттылар. Хатын-аналардынъ аьр бирисине йолыгыста гуьл байламлар эм савкатлар тапшырылды.
Район китапхана етекшиси Сабират Абубекерова йыйылганларды хошлап, хатыннынъ бас борышы – ана болув, тийисли кепте увыллар эм кызлар тербиялав
экенин белгиледи. Онынъ соьзлери мен, СВО барысында курман болган йигитлердинъ аналары Эли уьшин энъ де аявлысын – увылын берип, оьз атларын Россия тарихине язганларын белгиледи. Район Хатын-кызлар советининъ председатели ян авырувы ман согыс спецоперация барысында бизим 32 ердесимиз ян бергенин, уьйкен оьктемлик пен Россия баьтири деген сыйлы атка 16 дагестанлы тийисли болганын белгиледи. Асият Манкаева СВО озып турган ерге гуманитарлык юк элтегенлер мен барган, йигитлеримизди коьтергишлев мен байланыслы ак ниетли исинде коьп кыйын салган алдынгы ДР Хатынлар союзынынъ председатели Интизар Мамутаевады ийги соьз бен эсине алды.
Солай ок хатынларды ана куьни мен, администрация ислери бойынша етекши куллыгын кесек заман юритуьвши Алия Кусегенова, УСЗН бас специалисти Мавлизат Бальгишиева, КЦСОН специалисти Джамиля Халилова кутладылар. Мавлизат Бальгишиева СВО катнасувшылары, олардынъ аьеллери кайдай льготалар ман пайдаланмага болатагынын да айтты.
Йолыгыс барысында шатлык иелерине ДР ат казанган артистлери Гульназ Теркеева эм Медина Елманбетова йырлар савкатладылар. А.Джанибеков атындагы мектебининъ окувшысы Мадина Курганова юреклерге етип ятлав окыды. Шара йылувлыкка эм танълыкка толып оьтти.
Хатын-аналар! Олар тербиялайдылар Эл коршалавшыларын. Аналар, олардынъ увыллары намыслы эм эркли болып оьссин деп, баьри куьшин аямайдылар.
Тийисли аьдемлерди тербиялап эм оьстирип, Элин коршаламага йолга саладылар. Сол йигитлик тувыл ма? А ол баьтирше янын берди деп эситуьв ше? Дав майданларда янлары курман болган йигитлер аналарынынъ кайгысын бир соьзлер мен де енъил этип болмайсынъ.
Аявлы аналар! Сизинъ увылларынъыз – баьтирлер, олар оьлимсизликке абытлаганлар, биз олардынъ йигитлиги мен, эрклиги мен оьктемсиймиз. Олар дайым да халкымыздынъ юрегинде яшаяклар!
Нурият Кожаева.
Суьвретте: йолыгыстан коьринис.
