Уьстимиздеги йылдынъ шилле айынынъ 22-нши куьнинде Кизляр районынынъ аькимбасы Аким Микиров военный комиссар Рамазан Курамагомедов пан бирге
СВО юрген ерде яны курман болган аьскерши Гасбан Гаджиевтинъ аьелине патшалык савгасы берилди. Аьскершиге оьлгеннен сонъ тапшырылган Йигитлик орденининъ тапшырылув шарасы Аверьяновка авыл администрациясында оьтти. Савгады аьскершидинъ анасы Патимат Магомедовнага тапшырдылар.
Аким Микиров Йигитлик орденин тапшырувда уьйкен йойым сезуьв мен байланыста кайгырувын билдирип: «Сизге Аталыгымыздынъ шынты йигитин йигерли эм
коркынышсыз этип тербиялаганынъыз уьшин разылыгымызды билдиремиз! Ол элимиздинъ кызыксынувларын коршалавда оьз яс яшавын курман этти. Ердесимиздинъ алдына салынган борышын намыслы толтырып, коьрсеткен йигитлиги бизим эсимизде дайым сакланар», – деди район аькимбасы.
Аьскершидинъ анасына разылык соьзин Рамазан Курамагомедов та каратты. Ол да аьскершидинъ кардаш-тувганларына ден савлык эм сол авыр йойымды оьтуьвде уьйкен куьшкуватты йорады.
Гасбан Гаджиев Кизляр районында тувып оьскен. Черняевка авылында мектебинтернатында билим алган. 2017-нши йылда окув ошагын тамамлап, 2021-нши
йыл аьскер сырасына эр борышын толтырмага йолланады. Оннан сонъ Россия Федерациясынынъ Савытлы куьшлери сырасында службасын оьтпеге деп контрактка кол басады. 2022-нши йыл согыс спецоперациясында катнаспага йибериледи. Каты урысларынынъ бирисинде каты яраланады. Госпитальде эмленген сонъ да СВО юрген ерде душпанларды урып келеди. 2023-нши йылдынъ навруз айынынъ 31-нши куьнинде йигитлерше ян берген эм Акуша районынынъ Гинта авылында койылган. Йигит ястынъ дослары, таныслары, окытувшыларынынъ эслеринде ол яваплы, алал, сабыр эм ашык юрекли аьдем болып калган. Гасбаннынъ анасынынъ соьзи мен, ол бала шагыннан алып аьскершилик кесписин алмага мырат эткен, яслайын аьелине аякка турмага ярдамласып, кишкей инисининъ тербиялавында да оьз
уьлисин косып келген.
Суьвретте: шарадан коьринис.