Специальли согыс операциясы. Мага коьре, бу соьзлер аьр бир россиянлыдынъ юрегинде авырув болып сезиледи, баскалыгы йок, сол ерде бизим ювыгымыз куллык этеме, этпейме. Олар, бизим коршалавшылар, бизим баьтирлер, аьр биримизге ювык болып каладылар. Биз олар ман оьктемсиймиз, биз оларга тилек тилеймиз.
Астрахань областиндеги Сеитовка авылы 1788-нши йылда Берекет йылгадынъ басында Ахтубадынъ сол ягасында туьзилген. 1874-нши йылда оны аьли орынласкан ерине коьширгенлер. Баслап бу ер ногай-карагашлардынъ кыслыгы эди. 1859-ншы йылда авылда 70 казан-уьй, 6 межигит болган, баьриси 5 мынънан артык аьдемлер яшаганлар. 1918-нши йылда Сеитов волости туьзилген, 1925-нши йылдан алып Сеитов авыл совети болган. Мунда тувган эм оьскен Салих Шафи увылы эм Гульнур Гумар кызы Адиловлардынъ аьелинде меним хабарымнынъ баьтири. Аьелде эки увыл – Шамиль эм Рамиль тербияланганлар. Ногайда айтув бар: «Эр киси эли уьшин тувады». Сол соьзлерди бизим йигитлер баьриси де биледилер, сога коьре увылларын уьйдинъ, аьелдинъ, оьз элининъ коршалавшылары этип тербиялайдылар. Адиловлар да увылларын шынты эр кисилер этип оьстирдилер. Рамиль эки йогары билимин алды – Москвадагы индустриальли патшалык университетин эм Омсктагы МВД академиясын битирди. Сонъында – полицияда куллык этуьв, Рамиль Салих увылы Астрахань каласында уголовлык излев районлар ара боьлигининъ етекшиси болып ислеген. Ислеген йыллары ишинде Дагестан Республикасында, Кабарты-Балкарияда контртеррористлик операцияларында катнаскан, соны онынъ патшалык баргылары шайытлайдылар – «За ратную доблесть», «За мужество и отвагу», «За отличие», «За боевые отличия», «За воинскую доблесть». Бу ерде белгилев керек, бу баргыларга Рамиль Адилов СВО басланмаган заманда тийисли болган.
Аьр аьдемнинъ бактысы баска. Бизге Кудай ман берилген яшавдан биревимиз де кашып болмаймыз. Рамиль Адиловтынъ яшавында болып калган аьллер ясты сындырып, оьзине бойсындырып болмады, олар эр кисиге оьз яшавы акында ойламага амал бердилер. Мен бир такыйкага да шекленмеймен, Рамиль Аталыгын сакламага кайдай аьллер де кеткен болар эди. Яшавындагы кыйынлыкларды Рамиль нымыслы оьтти. Мен бу ерде согыс корреспонденти, россия журналисти, язувшы эм блогер Семен Пеговтынъ соьзлерин келтирмеге суьемен.
Ол Рамиль мен хабарласув эткен, 9-ншы мотострелковый «Шторм» батальонынынъ аьскершилерин баьри элимизге коьрсеткен.
– Согыска ясларымыз кайтип туьсип калганы акында хабарлар коьп эм туьрли. Бу ерде кимнинъ аркасы артында не зат бар экени маьнели тувыл. Олардынъ юреклеринде эм колларында не зат бар экени – маьнели. Олардынъ юреклеринде – киши эм уьйкен Аталыкка суьйим. Колларында – тынышлык уьшин савыт-садак. Олар куьн сайын баьтирлик коьрсетедилер! Сизди Кудай сакласын!
Меним сюжетимнинъ баьтири – аьскерши Рамиль Адиловтынъ (позывнойы «Ногай») акында билдируьвлер. Согыстан уьйге кайтып, ол Астраханьде СВО катнасувшыларына тегин ярдам этетаган юридический фирмасын ашады.
Оьзи «Ногай» – аьлемет бактылы инсан. Миллети – ногай (позывнойы соннан). Уголовлык излев боьлигининъ алдынгы етекшиси, 2016-ншы йыл дембиге йолыккан. Коршалав министерствосы ман туьзилген «Шторм Z» командасына Рамиль де кирген.
– Бизди бек ийги этип аьзирлегенлер, – деп эскереди «Ногай». – Степовое, Щербаки, Малые Щербаки ерлерине разведкага баратаган эдик, согысувлар да болды. Лобковое авылын штурм ман алдык. Коьплеген аьскершилер колын, аягын алдырдылар, нешевлеримиз де тыншайды.
Рамиль контракт биткен сонъ уьйине кайтты, эркинликке шыкты. Бир кесек заманнан сонъ тагы да СВО ерине йолланды – Судоплатов атындагы батальонында куллык этти. Яраланды. Согыска гуманитарлык юклерин тасыйтаган эди. 2023-нши йылдынъ карагыс айында уьйге кайтып келеди, – деп язады ол социальли тармакларда.
Журналисттинъ соьзине макул боламыз. Рамиль Адилов – аьлемет бактыдынъ инсаны. Мен оны ман таныс болмасам да, мага ол – Баьтир. Видеоларда онынъ кайтип согысканын, аьдемлерди манъгазылардан шыгарып, куткарганын коьрдим. Айлап манъгазыларда турып, россия аьскершилерин куьтип турган аьдемлерди «Шторм» батальонынынъ йигитлери куьн сайын шыгарып турадылар. «Хан» комбатынынъ буйырыгы ман, «Кипиш», «Башкир» эм «Ногай» позывнойлары ман штурмовиклер Нью-Йорк авылында манъгазыда 70 куьн яшаган яшавшыларды куткарганлар. Яшавшылар аьскершилер мен бирге, дронлардынъ атылувларына туьспес уьшин, 16 шакырым яяв юрдилер. Куткарылганлардынъ арасында 7 ясындагы кыз бар эди, оны штурмовиклер шеретлеп коьтерип аькелдилер. Сонъ ол кызалак айтар: «Бизди куткарган уьшин Владимир Владимирович Путинге савбол». Онынъ уьйкен мыраты – мектебке барув.
Рамиль аьли де алдыда. Дзержинск (Торецк) еринде согысувда каты яраланды. Штурмовиклер командири бир неше куьлле алды – экеви мойынга, биреви коькирегине, калганлары аякларына. Командирдинъ айтувы ман, штурмовиклер укроплардынъ уьстине туьсип калганлар, каты согысув болды сол заман. Сонъында онынъ йолдаслары айтарлар, командир, каты яраланганына да карамастан, аьскершилерге буйырыклар берип турган. «Ногай» эвакуациядан сонъ 4 госпитальлерди оьткен – Донецк, вертолет пан Ростов-на-Дону каласына, самолет пан Питерге эм Улан-Удэ.
Йигерли аьскерши «Ногай» деген позывнойы ман. Ызына дейим эмленмеди, етинши куьлледи шыгармадылар, болса да Рамиль СВО ерине оьз йолдаслары ман явды урмага кетти. СВО-да куллык эткен заманы ишинде Рамиль Адилов Жуков медали (2023 й.), «За освобождение Новгородского» (2024 й.), «За боевые заслуги» (2026 й.) согыс баргылары ман савгаланды. Ол Аталыкка суьйим эм халклар ара дослыкты беркитуьв уьшин «Имам Шамильге – 225 йыл» деген сыйлы белгиге тийисли болган. Россия Президенти Владимир Путиннинъ 2026-ншы йылдынъ шилле айынынъ 28-нши куьнинде шыккан указы ман Рамиль Адиловка Йигитлик ордени тапшырылган.
Аьлиги заманда Рамиль алдышылыкта. Ол айтады: «Меним саклавшы маьлегим – меним анам, ол мени баьри баьлелерден саклайды». Оькинишке, Рамильдинъ анасы Гульнур Гумар кызы уьш йылдынъ артында дуныядан кешкен (яткан ери ярык болсын).
Эркли, бажарымлы, оьз яшавында дурыс сайлав эткен – оьз Аталыгын саклавга атланган баьтирдинъ акында язбага соьз де етпес деп ойлайман. Мен тек бир затты тилеймен Кудайдан – сакласын Рамильди, уьйде куьтип турган ян косагы Зульфия, кардаш-тувганлары, дослары оны йылы кушагына алсынлар. Кудай баьри коршалавшыларымызды да сакласын.
Г.БЕКМУРАТОВА.
Суьвретте: Р.Адилов.