Ногай район орталыгы Терекли-Мектеб авылынынъ патшалык ногай халк саз алатлар оркестрининъ меканынынъ алдында Дагестан халкларынынъ Бирлик куьнине багысланган байрам шарасы болып озган.

Йыйылган ямагатка каратылган кутлав соьзи мен Ногай район администрациясынынъ аькимбасы Джамалутдин Эсиргепов шыгып соьйледи. Ол 15-нши сентябрь куьнинде савлай бизим республика бас патшалык байрамлардынъ бириси – Дагестан халкларынынъ бирлик куьнин белгилейтаганын эске
салды. Район етекшисининъ соьзи мен, сол куьн биз оьзимизди уллы бурынгысы, тийисли аьлигиси эм ярык келеектегиси, уьйкен маданият, экономикалык эм аьдем потенциалы болган ялгыз бир эм куватлы Дагестаннынъ кесеги экенимизди аян сеземиз.
«Бу эстеликли куьн бизим республикадынъ баьри де несиллерининъ аьдемлери уьшин бирликтинъ, кардаш дослыктынъ, тувган ерге суьйимликтинъ баалыкларын шайытлайтаган, ямагатты бирлестиретаган, уллы тарих эм элимиздинъ уьйкен потенциалы акында эске салатаган байрам болады.
Буьгуьнлерде, юритилип турган согыс спецоперациясы барысында бизим элимиз оьз суверенитетин, оьзининъ келеектегисин коршалайтаган заманда бизге айлак та бек ямагаттынъ тыпакласувы керегеди, биз бир болмага, тынышлык, еримиздинъ келеектегиси уьшин татым болмага борышлымыз. Тек татымлык пан биз алдымызда туратаган борышларымызды шешермиз», – деп белгиледи ол. Авыл эм район ямагатын солай ок Ногай район администрациясынынъ Ямагат палатасынынъ председатели Эльмурза Саитов та кутлады. Оьзининъ соьзин ол бас деп районнынъ буьгуьнги яс-явкасына каратты эм ога ис уьстинликлерди, берк ден савлыкты, ясуьйкенлерди сыйлап билуьвди йорады. Эсли несилге Э.Саитов коьтеринъки ян-коьнъилди эм узак оьмирдисагынды. Байрам шарасын патшалык ногай оркестрининъ, патшалык «Айланай» фольклор-этнографиялык ансамблининъ, «Карлыгаш» балалар уьлгили ансамблининъ артистлери анъ, биюв эм йыр шатлыгына толтырдылар.
М.Ханов.