Шатраш ойынын эки аьдем ойнайды, 64 клеткалы тактада 32 фигуралар орынласкан. Шатраш ойыны Индия элинде шыккан.
Бизим элимизде бу ойын 9-10- ншы юзйыллыклардан алып белгили, ол оьзинде спорт, саният, илми белгилерин бирлестиреди, аьдемди ойлап уьйретеди,
эрклик касиетин кеплейди, тербиялайды. Айшат Арсланова А-Х.Джанибеков атындагы мектебте 2-нши класста окыйды (окытувшысы Г.Хозбулатова). Окымыслы кызалак шатраш ойыны ман кызыксынады. Балалар бавына юретаган заманда кызалак секцияга юрип баслаган, тренери Арслан Елакаев. Туьрли ярысларда катнасып, Айшат сол заманда да баргылы орынларды алатаган эди. Быйыл Айшат Арслановага шатраш бойынша экинши разряд бердилер. Дагестан Республикасынынъ Бириншилигинде 11 яска дейим кызлардынъ арасында ол 2-нши орынга тийисли болды.
Янъыларда Айшат тез шатраш ойыны бойынша Дагестан Республикасынынъ Кубогына ярыстынъ 4-нши кезегинде 9 яска дейим кызлардынъ арасында баргылы биринши орынды алды.
Ога Дагестан Республикасынынъ шатраш федерациясынынъ президенти Д.Джакаевтинъ атыннан Диплом тапшырылды. Бу айдынъ ызында яс шахматист Дагестан Республикасын Черкесск каласында СКФО Бириншилигинде коьрсетпеге ниетленеди.
Шатраш ойынынынъ енъуьвшиси Айшат Арслановага келеекте коьп уьстинликлер сагынамыз.
Г.Абдулакимова.
Суьвретте: Айшат Арсланова.