Бийке Исхак кызы Кулунчакова 1946-ншы йылдынъ сары тамбыз айынынъ 11-нши куьнинде Ногай районынынъ Терекли-Мектеб авылында тувган. Онынъ
бала шагы эм яслыгы Ногай шоьлинде оьткен, сонъында бу йылларда болган оьзгерислер язувшыдынъ шыгармаларынынъ негизи болды. Бийке Кулунчаковадынъ биринши хабарлары ногай тилинде «Шоьллик маягы» газетасынынъ бетлеринде баспаланган. 1979-ншы йылдан алып СССР Язувшылар
союзынынъ агзасы, 1994-нши йылдан алып Дагестан Халк шаири болады. Ол – Сулейман Стальскийдинъ баргысынынъ иеси, ДР Язувшылар союзынынъ правлениесининъ агзасы, коьплеген адабият баргылары ман, медальлери мен савгаланган.
Буйнакск каласындагы педучилищеди биткен сонъ, Бийке Исхак кызы авыл мектеблеринде окытувшы болып ислеген. Адабиятка ымтылыс, язувшы талабы онынъ бактысын туьрлендиреди. 1969-ншы йылда ол Дагестан педагогикалык институтынынъ филология факультетине туьседи. Сол йылларда ол эки повестьлер язады – «Бир аьелде» эм «Казбек», бу шыгармалар ногай тилинде айырым китаплер болып баспаланадылар. Сонъында язувшыдынъ уьш китаби
шыгадылар – «Боз торгай», «Солай да болады», «Тунъгыш». Москва каласында Бийке Кулунчаковадынъ китаплери орыс эм ногай тиллеринде дуныя ярыгын коьредилер.
Бийке Исхак кызынынъ шыгармалары баска тиллеринде де баспаланып турадылар. Соьйтип, 1985-нши йылда Каракалпакияда «Бесинши байрам» деп аталып, каракалпак тилинде китап ярык коьреди. Буьгуьнлерде язувшыдынъ коьплеген китаплери орыс эм ногай тилинде окувшылар ман окылынадылар.
Бийке Кулунчакова – «Шоьлдинъ ак кызы» деген пьесадынъ авторы. Пьеса Москва, Киев, Махачкала калаларында баспаланган, Братск, Полтава, Тула, Нукус, Железногорск калаларында эм Дагестан Республикасында патшалык театрларынынъ сахналарында салынган.
Бийке Исхаковна Кулунчакова – РСФСР, СССР, Дагестан Республикасынынъ язувшылар съездлерининъ делегаты, туьрли эллерде Дагестан саният эм адабият куьнлерининъ катнасувшысы.
2026-ншы йылда шоьлимиздинъ данъклы кызы оьзининъ сыйлы мерекесин хош алаяк. «Шоьл тавысы» республикалык газетасынынъ бетлеринде, сол оьзгериске рас болып, Бийке Кулунчаковага багыслап, рубрика ашамыз. Биринши болып, язувшыдынъ «Казбек» повестин баспалаймыз.
Гульфира Бекмуратова, Россия Язувшылар союзынынъ агзасы.