Дагестан Республикасынынъ Халк шаирлери Марина Ахмедова-Колюбакина эм Залму Батирова миллет адабият «Соьз» баргысынынъ лауреатлары болдылар, дагестанлылар язувшылар арасында олар – бириншилер. Баргыды енъуьвшилерге Россия Президентининъ пресс-секретари Дмитрий Песков тапшырды.
«Соьз» – ол тек баргы тувыл, янъы атларга йол ашатаган эм маданият ямагатын бирлестиретаган уьйкен проект. Дагестан Республикасынынъ Язувшылар союзынынъ председатели, ДР Халк шаири Марина Анатольевна Ахмедова айтылган баргыдынъ «Художестволык коьшируьв» номинациясында «Хунзах ханша: Трагедия» шыгармасын коьширгени уьшин енъуьвши болды. «Мастер» категориясында М.Ахмедова биринши эди. Ога эм автор Залму Батировага баргыды Д.Песков тапшырды. Россия Президентининъ пресссекретарининъ айтувы ман, бир маданият та, уллы орыс маданияты болса да, ялгыз оьзи оьрленип болмайды.
– Биз савлай дуныядынъ кесеги болмага керекпиз. Художестволык коьшируьвшилер орыс маданиятынынъ оьрленуьвине оьз уьлисин косадылар. Бизим элимизде юзден артык миллетлер, этнослар яшайдылар. Солардынъ аьр бириси оьз маданиятынынъ ярасыклыгын, байлыгын орыс халкы деп аталатаган йылгага косадылар. Сол
орыс халк оны оьрлендиретаган булаклардынъ аркасы ман цивилизация болып, аьлиги заманнынъ талаплавларына келисли болады, – деди Дмитрий Песков.
Енъуьвшилерди Россия Федерациясынынъ Президентининъ Администрациясынынъ етекшисининъ орынбасары Магомедсалам Магомедов кутлады. Ол йиберген кутлав адресинде булай язылган: «Сизинъ биргелес исинъиз халклар ара анъламлыкты беркитетаган эм этномаданият байлыкты саклайтаган шынты маданият диалогты
коьрсетеди. Дагестан адабияты мынълаган йыллардан бери туьрли миллетли инсанларды бирлестиретаган тувган ерге ийги этип каравдынъ, аьдетлердинъ эм анъ-эдаплык
баалыклардынъ коьрими болады».
Марина Анатольевна Ахмедовады сондай йогары баргы ман Дагестан Республикасынынъ Аькимбасы Сергей Алимович Меликов кутлады.
Шынты соьздинъ усталары Марина Ахмедовады эм Залму Батировады енъуьв мен исси кутлаймыз, аьли де коьп яратувшылык бийикликлер йораймыз.
Г.Бекмуратова.
Суьвретте: баргы иелери М.Ахмедова эм З.Батирова.
