Баьримизге де белгили болганлай, йылдынъ язлык шагынынъ басланувы ман республикамызда, табиат шартларынынъ туьрленуьви мен, аьдемлердинъ турак уьйлерине, яшаган ерлерине коьп зыян келди.
Соны ман байланыслы болып, Дагестан Республикасынынъ тав якларында эм ювыгында яшайтаганларга бек авыр заманлар оьттилер. Ама бизим республикамыз оьмирлер бойы тыпак, туьрли миллетли халклар тил бирликте яшайтаганы белгили болганнан себепли, бир-биримизге кыйынлыкта да кол созып, баьри затты да ортак боьлисип боламыз.
«Кыйынлык бир аьдемнинъ басында тувыл» деген ийги соьзге бу куьнлерде де орын табылды. Республикамызга кол, материаллык ярдам савлай Россиядан эм конъысы шет эллерден келди эм аьли де келуьвде.
Бизим кишкей Ногай районымыз да шетте калмады. Биринши болып, колдан келген ярдамымызды кыйынлыкка калган авылдасларымызга этпеге шалыстык. Сув астында калган авыл яшавшыларына бир неше кере халк куьши мен материаллык ярдам этилинди. Сол исти уйгынлаганларга уьйкен разылык. Тек туьнегуьн Россия МВД-сынынъ Ногай райондагы боьлигининъ куллыкшылары да, айырым оьзлерининъ организациясы атыннан, Дагестаннынъ Дахадаевский эм Тляратинский районларында болып, азыктуьлик эм малга пишен тюклерин еткерип келдилер.
Правоохраналык органларынынъ куллыкшыларынынъ билдируьви мен (сол ярдамды ерине еткергенлер) Дахадаевский эм Тляратинский район яшавшылары оьзлерининъ ак юрекли савболсынларын айттылар, деп билдиредилер. Аьр кайсы аьдемге де – кыйынлыкта табылган йолдас маьнели.
Галима Курганова.