Онынъ яшавы 2024-нши йылдынъ карагыс айында туьрленди: тынышлы эркин шак – согыс спецоперациясы…
Бу куьнлерде ердесимиз Арсланбек Сталинбек увылы Култаев – согыс спецоперациясынынъ катнасувшысы, автокоьлик айдавшысы ис орынында болып,
дав майданда болатаган баьри кыйынлыкларды да оьз коьзи мен коьрип, йигерлиги мен оьтип келеди. Сол белсенли аьрекети уьшин Арсланбек аьлиги заманда бир неше патшалык белгилерге тийисли болганлардан: «Согыс спецоперациясынынъ катнасувшысы», «За боевые отличия», «За храбрость»
медалининъ II дережеси, «За отвагу». Аьли де алдыда яркын яшав, сонда да бизим йигит ердесимиз коьплеген уьстинликлерге етисеегине шекленмеймен. Соны яшав оьзи коьрсетер.
Белгилеп озайым, Арсланбек – бек бавырмалы, дайым коьнъили ток, оьзи йигерли эр киси.
Ога дайым коьрим болып келген атасы Сталинбек, Афганистан еринде он йыл узагына созылган урыслардынъ катнасувшысы, оьзи «Кызыл юлдыз» орденининъ иеси. Сондай Эр киси тербия берген яс болады бизим
Арсланбек. Ол йигерли, Элине яв шапканда, коршалавга турмай да болмаяк эди. Кан ман келген сол касиет ога, деп айтсам, ялган тувыл. Бу ерде атайларымыздынъ айткан соьзи – Уяда не коьрсе, ушканда соны этер, – дегени акыйкат тувыл ма? – Элбетте!
Ногай районымыздынъ маданият орталыгы болган ТереклиМектеб авылында Сталинбек пен Арувзат Култаевлердинъ аьелинде Арсланбек кенжепайы
болады.
Аьли мен сизге баьтир ердесимиз Арсланбек «За храбрость» медалининъ экинши дережесине не уьшин тийисли болганы акында айтып кетейим.
2025-нши йылдынъ яз шагы.
Гвардиядынъ рядовойы Арсланбек Култаев, кезекли ис борышын алып, согыс майданыннан яраланган аьскершилерди шыгармага кетеди. Оны ман бирге янында «Хан» деген шакырувы болган аьскерши йолдасы бар эди. Етекшилери мен белгиленген согыс майданы. Аьскершилер борышларын толтырувга
шыктылар. Айлак куьшли яраланганлар да бар эди. Оларга биринши медициналык ярдамды этедилер. Баслап ис ийги бараятыр эди. Сонъ басланды энъ де
кыйыны.
Явдынъ куллесиннен, карасыннан арман таймага аз заман калды дегенде, басланды атылув. Арсланбек айдайтаган коьликке дрон аркалы яв тускалды. Мине бу ерде аьр бир алынган абыт яшав оьмирге кавыфлы эди. Арсланбек коьп ойланмады, заман да йок эди, аьскерши йолдасларды аркасына салып, куьлле отыннан армаганга тайдырды.
Йолдаслар куткарылдылар, ама автокоьликти аьскерши йойды…
Аьли аьдем яшавы эди маьнели деген. Бу ерде мен Арсланбектинъ йигерлигине, каты эр кисидинъ касиетине сукланмай болмадым. Неге каты деп сорав
бергенлер де болар. Тагы да кайтарып айтпага ийменмеймен, каты касиет болмаган аьдем, тек оьз яшавын куткармага шалысар эди. Ол болса, йолдасларын да ойлаган.
СВО катнасувшысы, аьлиги заманда ден савлыгына айлак куьшли зыян келип, уьйге кайткан баска йигитке: «Согыста аьдемде коркув деген сезимге
орын табылама?»,– деген соравды бир кере бердим.
– Согыста болып, коркпадым, деп айтатаган инсанга ынанманъыз, ол бу ерде ялган соьйлейди. Коркасынъ, биринши куьнлерде айлак та коркынышлы, сага таныс тувыл ер, бир де яшавынъда коьрмеген затлар, тоьгерек якта каранъалык, оьлуьв, куьллединъ туьтини…Ама коркыныштынъ да бир аьлеметлиги бар, сол сезим сени куткарувшы да болады, йолдасты да кыйынлыкта калдырмайсынъ, баьри де бирге болмага шалысады. Бирде йолдастынъ яшав оьмири оьзинъдикиннен де маьнели болып коьринеди. Куьш те келеди»,– деген эди сол яс эр киси.
Арсланбек те сондай йигитлердинъ бириси болады. Ол да – оьз яшавынынъ баасы ман, кайда болса да, йолдасларын куткараяк йигитлерден. Бу куьнлерде
сол ийги касиетин согыс спецоперациясы баратаган ерде коьрсетип келеди.
Мен бу макаламды язып турганда, согыс майданнан тагы да бир видеосюжет келди. Сонда да Арсланбек куллык этетаган куьптинъ аьскершилери, сол санда ол оьзи де бар, явдынъ дрон аркалы атысувы астына туьскени акында, бу ерде де йигитлердинъ тыпаклыгы оларды саклаган эм кыйынлыктан куткарган.
Арсланбек Култаев, атасы Сталинбектей болып, Элди явдан куткарувшылар саныннан болады. Онынъ да аты тарих бетлеринде элди коршалавшылар
санында келеектеги несиллерге коьрим болаяк.
Аьли болса, тыныш тувыл заманлар. Аьр кайсы СВО катнасувшысынынъ да ата-анасы оларга савлыкты тилеп турады эм уьйлеринде саклайдылар.
Арсланбекти ярасык кызы ман хатыны да аман-эсен келгенин карайдылар. Келер бизге тезден тынышлы яшав. Уллы Аталык согыс биткеннен сонъ, явды
тизине салган аьскершилерди йолыккандай, биз де йолыгармыз согыс спецоперация катнасувшыларын эм мине олар енъуьвши аьскершилер, деп те
айтармыз!
Г.Сагиндикова.
Суьвретте: Арсланбек Култаев дав майданда (суьврет уьй архивиннен).