Имам-Шамиль Арсен увылы Халилов Дагестан Республикасынынъ Ногай районынынъ Терекли-Мектеб авылында тувып-оьскен. Кадрия атындагы мектебин битирип, яс Санкт-Петербург каласындагы Михайловский согыс артиллерия академиясына туьседи эм уьстинликли кутарады. Мектебте, йогары окув ошагында Имам-Шамиль спорт пан каьр шегетаган болган, ийги окыганы уьшин академияда ога йогары стипендия тоьлейтаган эди.
Имам-Шамиль сайлаган кесписи кыйынлыклар ман байланыслы экенин анълайтаган эди, сога коьре окыган заманда соларга аьзирлик коьрген. Академияды битирген сонъ, яс офицер Екатеринбург каласына куллык этпеге шыгады, сонъында оларды Тоцкий ерине коьширедилер. Тез арада Имам-Шамиль Халилов СВО ерине кетеди. Ол аьлиги заманда Аталыкты саклавда алдыда турады эм баьримиз де куьтип турган енъуьвди ювыклатады.
Тамада лейтенант Имам-Шамиль Халилов – гаубичный артиллерия дивизионынынъ 2-нши гаубичный артиллерия батареясынынъ тамада офицери, взвод командири. Йигерли аьскерши коьпмиллетли дагестан халкынынъ алдындагы эткен айырым ислери уьшин алтын юлдыз бан савгаланган эм «Дагестаннынъ халк баьтири» деген атты казанган.
Ногайларда соьз бар: «Сый иесин табар». Биз ердесимизди сондай баргы ман кутлаймыз эм уьйге тез кайтып келгенин йораймыз.
Г.БЕКМУРАТОВА.
Суьвретте: И-Ш.Халилов.